A Policía pide colaboración para identificar un home que morreu no campus de Santiago

A Policía Nacional solicita a colaboración cidadá para a identificación do cadáver dun home de mediana idade falecido no campus universitario de Santiago de Compostela cando facía deporte o pasado sábado. Segundo informou a Policía Nacional, en virtude dunha resolución ditada nas dilixencias previas de investigación que se tramitan ante o Xulgado de Instrución número 2 de Santiago de Compostela, solicita a colaboración cidadá co fin de poder proceder á identificación do cadáver dun home falecido este pasado sábado.

A Policía indica que na mañá do 5 de marzo a persoa a identificar facía deporte no campus universitario de Santiago de Compostela cando "perdeu o coñecemento, foi atendido polo 061 e faleceu por causa indiciariamente natural". "Ata a data non deu resultado positivo o cotexo de pegada dactilar, nin a proba de identificación xenética, nin as diversas dilixencias de investigación autorizadas polo xulgado e levadas a cabo pola policía nacional de Santiago de Compostela", indica a Policía.

Respecto diso, indica que o falecido é un home caucásico aparentemente entre 50 e 55 anos, de 1,76 metros de altura, constitución atlética, tez e pel morena, pelo canoso curto, barba completa canosa e cellas canosas. O corpo non presenta marcas particulares e ten "unicamente cicatriz de 3x2 no xeonllo dereito", matizan as mesmas fontes policiais, que indican que carece de tatuaxes e vestía camiseta de cor azul talla XL marca Kalenji.

ROUPA DEPORTIVA

Ademais, levaba un pantalón curto de deporte da mesma marca e zapatillas de deporte talla 44, xunto a calcetíns do número 43-46, e o único efecto persoal que portaba era un reloxo con pulseira metálica con esfera azul marca Eternaamatic. Calquera persoa que poida achegar algún dato poderá facelo a través do 112 ou do 091, subliña a Policía Nacional.

Campus Sur, en Santiago de Compostela.