Violencia contra os sanitarios: Galicia rexistrou sete agresións en 2021

Os colexios de médicos de Galicia recibiron o pasado ano 2021 un total de sete denuncias por agresións a facultativos, das cales o 57 por cento corresponderon a homes e un 43% a mulleres. No conxunto de España foron 612 incidencias entre 52 entidades colexiais. Así consta no informe correspondente a Galicia difundido este xoves polo Consello Xeral de Colexios Oficiais de Médicos con motivo da celebración o próximo día 12 de marzo do Día Europeo contra as agresións a médicos e profesionais sanitarios.

O informe correspondente a Galicia, recollido por Europa Press, reflicte que o 42,9 por cento dos médicos agredidos tiña entre 36 e 45 anos; o 28,6% entre 56 e 65; e o outro 28,6%, entre 46 e 55 anos. En canto ao sexo e á idade, no informe indícase que no caso dos homes o 75% dos agredidos tiña entre 36 e 45 anos e o 25% entre os 56 e 65; mentres que no das mulleres, o 67% situábase entre os 46 e 55 anos e o 33%, entre os 56 e 65.

ÁMBITO

En canto ao ámbito no que se produciron esas agresións, o informe sinala que no 42,9 por cento dos casos foi en Atención Primaria; no 28,6% en hospitalaria e o 14,3% en domicilio. O 83 por cento das agresións a médicos rexistradas en Galicia tiveron lugar no ámbito da sanidade pública --o 60% a homes e o 40% a mulleres-- e o 17% no privado --todas a homes--.

Centro de saúde, atención primara / Europa Press. / Europa Press