Por E.P. | SANTIAGO DE COMPOSTELA | 16/03/2022 | Actualizada ás 12:12
O Tribunal Superior de Xustiza de Galicia (TSXG) declarou que unha traballadora dunha escola infantil dependente do Consorcio Galego de Servizos de Igualdade e Benestar --dependente da Xunta-- á que lle cambiaron á quenda de tarde ten dereito a que a súa xornada sexa en horario de mañá, de 9,00 a 16,00 horas, para poder conciliar e encargarse do coidado dos seus pais.
Segundo informa o TSXG, a Sala subliña que, no curso 2021-2022, despois de varios anos nos que desenvolveu a quenda de mañá, déuselle a de tarde, de 13,00 a 20,00 horas, o que lle supuxo "unha importante alteración da organización e coordinación que tiña establecida para levar a cabo o coidado do seu pai e da súa nai", quen precisan, polo seu estado de saúde, asistencia ou axuda para actividades da vida diaria, segundo consta en informes médicos e dos servizos sociais.
Os maxistrados indican que "non puido concluírse" que recoñecerlle a adaptación solicitada "comporte unha especial dificultade organizativa para a empregadora, nin tampouco que exista un obstáculo produtivo", pois a traballadora "xa estivo sen prestar servizos na quenda de tarde durante os últimos cursos", ten a condición de educadora, e a empresa recoñeceu que existían oito educadoras, e non consta que exista ningún outro traballador ou traballadora con medidas de conciliación ou adaptación.
3.000 EUROS DE INDEMNIZACIÓN
O TSXG tamén impuxo á Administración pública o pago dunha indemnización de 3.000 euros á afectada polos danos e prexuízos derivados da denegación da adaptación de xornada. Contra a sentenza, cabe presentar recurso de casación.
Sobre esta sentenza, fontes da Consellería de Política Social trasladaron o seu respecto á decisión do TSXG. Engaden que nos centros de servizos sociais é necesario cada día "compatibilizar a necesidade de ofrecer o servizo de forma continuada e coa máxima calidade coas necesidades de conciliación" dos traballadores". "Todas as decisións que se toman son orientadas a harmonizar estas dúas perspectivas: a das familias usuarias e a do persoal que traballa nos centros", conclúe Política Social.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.