Por Europa Press / Redacción | SANTIAGO DE COMPOSTELA | 18/03/2022 | Actualizada ás 11:48
Un mozo resultou ferido nun accidente de tráfico rexistrado na madrugada deste venres na parroquia de Ponte Maceira, no municipio coruñés de Negreira, ao chocar un coche contra un muro tras o que se incendiou.
Segundo relataron os Bombeiros de Santa Comba, recibiron ás 00,41 horas deste venres o aviso por este accidente cun coche que ardía na estrada AC-544 ao seu paso por Ponche Maceira.
Como consecuencia do impacto, o condutor, que saíu polos seus propios medios do vehículo, sufriu diversas lesións, das que foi atendido nun centro hospitalario, sinalou o 112 Galicia.
Os feitos ocorreron ás 00,30 horas deste venres, tal e como indicou a persoa que chamou ao 112 Galicia para informar dun condutor ferido grave e tendido na vía por mor dunha colisión. Ademais, engadiu que o coche ardía, polo que, ademais de Urxencias Sanitarias de Galicia-061, era necesaria a intervención dos bombeiros.
CAMIÓN DE CONXELADOS ENVORCADO
Por outra banda, no atardecer deste pasado xoves tivo lugar outro sinistro, neste caso cun camión conxelador implicado, que envorcou na AG-53, en Loeda, no municipio de Piñor. Este accidente causou algunha dificultade na circulación mentres duraron os traballos para a retirada do vehículo. Con todo, nin chegou a arder, nin o condutor quedou atrapado como se pensaba inicialmente, matizou o 112.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.