A Xunta dedica 100.000€ a "estudar" a evolución da figura do peregrino nun congreso
A cita vai xa pola súa duodécima edición e terá lugar en Santiago entre o 22 e o 26 de marzo.
Por Europa Press / Redacción | SANTIAGO DE COMPOSTELA | 20/03/2022 | Actualizada ás 13:24
O XII Congreso Internacional de Estudos Xacobeos celebrarase en Compostela do 22 a 26 de marzo e analizará a evolución desde o peregrino medieval ata o viaxeiro moderno que fai o Camiño de Santiago e narra a súa viaxe nas redes sociais. Segundo informou a Xunta, que organiza a iniciativa en colaboración co Comité Internacional de Expertos do Camiño de Santiago, o congreso reunirá a máis de 30 expertos de todo o mundo para analizar tamén a evolución do Camiño de Santiago nas últimas décadas en comparación con outras peregrinacións en América Latina, Xapón e outras partes do mundo. De acordo cos datos públicos da propia administración autonómica, a cita de cinco días sairá por 100.000€, importe que saíu a licitación nun contrato pola propia Xunta.
Nas sesións falarase tamén do Códice Calixtino, os contidos do Museo da Catedral, a arte na ruta xacobea e os retos de futuro para o Camiño de Santiago. Nesta edición encargaranse da coordinación do congreso Paolo Caucci Von Saucken, profesor da Univertità degli Studi de Perugia; e Manuel Castiñeiras, catedrático da Universitat Autònoma de Barcelona.
Inaugurarase o martes 22 de marzo pola tarde, ás 18,00 horas no Hostal dos Reis Católicos de Santiago, coa conferencia inaugural 'A Peregrinación non Medievo Global: de Finisterre a Xerusalén'. Os asistentes ao congreso farán ademais unha visita a Padrón o venres 26 de marzo.
