O BNG vota en contra do plan de pensións do Goberno por temor a unha "privatización"
O Goberno apóiase no PP, Vox e Ciudadanos para facer avanzar a lei.
Por E.P. | SANTIAGO DE COMPOSTELA | 24/03/2022 | Actualizada ás 15:00
O proxecto de lei para o impulso dos plans de pensións relacionados co emprego superou este xoves a súa primeira votación no Pleno do Congreso rexeitando a emenda de totalidade defendida polo BNG, e apoiada por Esquerra Republicana, EH-Bildu, Más País-Equo, a CUP e Compromís, que pretendían devolver o texto ao Goberno.
O PSOE e Unidas Podemos superou a votación co apoio do PP, Vox, Ciudadanos e PNV, que defenderon seguir tramitando a lei e esperar á presentación de emendas ao articulado para discutir posibles cambios. Así mesmo, o Congreso aprobou a avocación ao Pleno deste proxecto, polo que será este órgano o que teña a última palabra sobre a aprobación da iniciativa e as súas emendas antes de enviala ao Senado.
TEMOR A UNHA PRIVATIZACIÓN DO SISTEMA
O BNG xustificou o seu rexeitamento á reforma ao considerar que abre o camiño para a substitución do sistema público a un de capitalización baixo xestión privado, e critica que se destinen esforzos para fomentar esta fórmula en lugar de fortalecer as pensións públicas con máis recursos.
O seu deputado, Néstor Rego, sinalou que os incentivos para dirixir recursos desde as empresas a estes mecanismos de aforro, en lugar de aumentar salarios, traduciranse en pensións máis baixas, do mesmo xeito que as maiores desgravacións que se prevén para incentivar estes mecanismos reducirán os ingresos públicos.
DEFENSA DOS PLANS
Na súa intervención para defender o seu proxecto, o ministro de Inclusión, Seguridade Social e Migracións, José Luís Escrivá, esgrimiu que a lei "en absoluto menoscaba" o sistema público, e defendeu esta reforma como contrapeso a un sistema de plans de pensións individuais que ve regresivo, por segregar o seu acceso entre a poboación con maiores ingresos.
Por iso, defendeu un réxime xurídico e fiscal diferenciado para primar os plans de pensións de empresa onde, ademais, a forza colectiva facilita o acceso a mellores condicións, con maior rendibilidade e menores comisións das entidades xestoras. Por iso, defendeu o desenvolvemento dun sistema que chegou a contar a principio da década dos 90 cun 50% dos recursos dirixidos a plans complementarios e que agora queda na 25% fronte ao fomento duns plans individuais con "rendibilidades historicamente baixas".
Polo PSOE, a exministra Magdalena Valerio, lembrou que o impulso a estes plans é unha recomendación do propio Pacto de Toledo, e que a reforma busca dar máis transparencia e control público aos mesmos, mentres que Isa Franco, de Unidas Podemos, rexeitou que exista un apoio público a estes plans, a pesar de que logo criticou que se contemplen exencións fiscais e de cotizacións para fomentalos.
