Autónomos galegos protestan contra o modelo de cotas de Escrivá e piden "flexibilidade" para "poder vivir"
Nas concentracións leuse un manifesto conxunto, no que os autónomos denuncian a "frustración" do colectivo polas condicións do sistema en España, con cotas "elevadísimas" e "prestacións ridículas".
Por E.P. | SANTIAGO DE COMPOSTELA | 24/03/2022 | Actualizada ás 20:43
Decenas de autonómos convocados pola plataforma Loita Autónoma concentráronse na tarde deste xoves en Santiago e Vigo para mostrar o seu rexeitamento ao plan de cotización para traballadores por conta propia do Goberno central, ao que demandan que "flexibilice" o modelo que a "asfixia".
A capital galega e a cidade viguesa foron dúas dos lugares das concentracións convocadas en distintos puntos da xeografía do Estado pola plataforma Loita Autónoma, que pretende canalizar o descontento dun colectivo "atomizado" e "con pouca conciencia colectiva".
Ao berro de "Escrivá escoita, autónomos en loita" e "As táboas de Escrivá ímolas tombar", unhas 50 persoas participaron na protesta de Santiago, celebrada na Praza do Obradoiro ás 19,00 horas deste xoves. En Vigo, a concentración tivo lugar no Farol de Urzáiz á mesma hora. Nas concentracións leuse un manifesto conxunto, no que os autónomos denuncian a "frustración" do colectivo polas condicións do sistema en España, con cotas "elevadísimas" e "prestacións ridículas".
"Queremos traballar para vivir, non vivir para traballar", denunciaron os traballadores por conta propia, que censuran o "mil trabas" coas que se topan para sacar adiante os seus proxectos.Reclaman unha baixada das cotas de cotización, "flexibilidade" á hora cumprir coas obrigacións e "facilidades" para manter á boia a súa actividade e tamén "investir" nos seus proxectos.
Tamén solicitan unha maior cobertura social, xa que, no caso de enfermidade ou de baixas por ter un fillo "ademais de percibir unha prestación ridícula" arríscanse a "perder clientes". Así as cousas, reiteraron a súa oposición á táboa de cotizacións proposta polo departamento que dirixe o ministro de Inclusión, Seguridade Social e Migracións, José Luís Escrivá; ao que piden que "escoite" ao sector para elaborar unha reforma do sistema "xusta".
