Por X.M. Fernández | Allariz | 26/03/2022 | Actualizada ás 11:00
Este sábado 26 de marzo terá lugar en Allariz a actividade ‘Ponme un poema!’ –poesía en barra-- un roteiro poético que comezará ás 19:30 h. e rematará ás 21:30 h. cun concerto-foliada a cargo de ‘Pandereiteiras Zutra’. A protagonista do recital itinerante será a poeta Olga Novo e o percorrido fará tres paradas: A despensa do Alarico, Fío de liño e Casa Pepiña.
Con esta edición será xa a novena deste evento que se fai posible grazas ao público asistente e aos establecementos colaboradores devanditos.
DIVAS DE DIVÁN
E para o domingo 27 ás 19:00 h. outra proposta para non perder. A compañía Tarabela Creativa trae á Casa da Cultura de Allariz a súa montaxe “Divas de diván”. O espectáculo forma parte da programación de actividades do Concello de Allariz co gallo do 8M.
Para reservas de entradas o concello recomenda facelo no teléfono 988 554059 ou no correo fogardosmaiores@allariz.gal
SOBRE O ESPECTÁCULO
Nas culturas celta, babilonia, sumeria, etrusca, nipona, azteca, semita,
mesopotámica, exipcia, chinesa, xermánica, nórdica, lituana, grega e romana, o pobo rendeu culto a distintas deusas da sexualidade, os desexos e mailo pracer. En Galicia, nos tempos que corren, a carnalidade e o instinto teñen templo en case cada casa no corpo de cada muller. Non é o mesmo ser divinidade que diva…
Por sorte, as divas que fan posible esta función son Vero Rilo, Ángeles Goás e Carmen Conde, tres narradoras que van contando as súas historias ‘picantes’ do imaxinario galego mentres pican queixo de tetilla, comparten uns chouriciños e proban unhas copas de licor café.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.