Nace ACousa, unha revista audiovisual dirixida a xeración Z galega

Este 24 de marzo tivo lugar a presentación de ACousa, unha revista audiovisual en galego pensada para as xeracións Z e millennial galegas que se difunde en redes sociais. Este proxecto foi gañador da Bolsa Nacho Mirás 2021, xunto con Zoom na Bagatela. No acto presentouse ademais a nova edición da bolsa, destinada a proxectos inéditos de xornalistas graduados nos últimos cinco anos.

ACousa é un proxecto de Xulia Lomba Fernández, Beatriz Gutiérrez Caneda, Aida Vilariño García e Yaiza López Otero que pretende abordar as preocupacións da mocidade galega desde unha perspectiva divertida e lixeira. "Queremos crear o contido que sempre quixemos consumir nós en galego e non atopamos", afirma o equipo de ACousa.

Empregando o xornalismo móbil como metodoloxía de traballo e as redes sociais como plataformas de difusión, ACousa abordará temáticas tan diversas como a tecnoloxía, a arte, a moda, a maquillaxe, a sexualidade ou a gastronomía.

"A idea é que sexa un espazo seguro para todas as persoas, no que ninguén se sinta discriminado polo seu xénero, orientación sexual, cor da pel, aspecto físico etc.", afirman desde a revista.

ACousa saíu ás redes este 24 de marzo. A primeira entrevista será unha conversa con Esther Estévez, presentadora do espazo dixital da CRTVG Dígocho Eu, que vén de ser galardoada na gala dos Mestre Mateo.