División ante o peche patronal do luns na hostalaría, que se ve "ao bordo da quebra"
Convócao hostalaría.gal e rexéitano as asociacións provinciais.
Por Europa Press / Redacción | SANTIAGO DE COMPOSTELA | 25/03/2022 | Actualizada ás 15:01
O peche patronal proposto para os establecementos galegos o vindeiro luns divide o sector. Así, mentres a plataforma hostalaría.gal e 21 entidades locais o manteñen, as federacións provinciais, Hostalaría Compostela e Hostalaría de Galicia desmárcanse e aprazan a posibilidade de convocar un paro ás medidas que o goberno tome a próxima semana en materia de enerxía e combustibles, así como ao posible fin do paro de transportes.
Así o confirmaron este venres en senllas roldas de prensa convocadas en Santiago, cunha hora de diferenza, nas que, no entanto, todos os implicados aseguraron que o difícil momento polo que pasa a hostalaría deixa "motivos dabondo" para convocar esta protesta. No caso dos que chaman ao paro, hostalaría.gal, fano a nivel de toda a comunidade autónoma, e co respaldo de 21 entidades de hostalaría de distintos puntos da comunidade que representan a uns 4.000 establecementos, apuntaron.
O presidente de hostalaría.gal, Lois Lopes, explicou que, ás malas condicións do sector polas restricións da pandemia súmase agora a alza dos prezos da enerxía, os combustibles e as materias primas, como a fariña ou o aceite, o que leva a moitos negocios ao bordo da "quebra".
En concreto, Lois Lopes precisou que algunhas materias primas, como o aceite de girasol, incrementaron o seu prezo por encima do 30%, un aumento de custos que, polo momento, non se está trasladando ao consumidor. De forma paralela, detectan unha "caída no consumo considerable" derivada da "perda do poder adquisitivo das familias", o que fai minguar aínda máis os seus ingresos e debuxa un futuro próximo "bastante incerto e pouco prometedor", explicou o presidente da plataforma.
PESO ECONÓMICO
Lois Lopes reivindicou o peso económico e social que ten a hostalaría e asegurou que se senten abandonados polos poderes públicos. "Sorpréndenos que desde as administracións estes días se estea a falar dos transportistas, dos gandeiros, dos pescadores, pero se obvie un sector fundamental como é a hostalaría, do que ninguén fala", subliñou.
Por iso, e para "visibilizar" a súa situación, manteñen convocado un peche patronal para o vindeiro luns, día 28 de marzo, e continuarán con "accións paralelas" como a solicitude de reunións cos responsables gobernamentais. Ademais de hostalería.gal de forma global, o paro está apoiado por 21 asociacións locais de distintos puntos de Galicia, como a Asociación de Hosteleiros e Autónomos de Ferrolterra, Hoempo, Ahituvi, Ahrou, a Asociación de Hostalaría de Padrón, a Asociación de Empresarios Lugo Monumental ou Noia en marcha, entre outros.
Lois Lopes explicou durante a rolda de prensa que a idea dun peche patronal partiu como "convocatoria en conxunto" e "unitaria" de todas as asociacións. "Así o decidimos a principio de semana", resolveu. Con todo, a mediados, "algunhas asociacións decidiron desmarcarse". Para o presidente da plataforma, a "falta de unidade segue sendo unha constante no sector", polo que apostou por continuar o esforzo de unificación.
As PROVINCIAIS E HOSTALARÍA DE GALICIA DESMÁRCANSE
Por outra banda, Hostalaría de Galicia daba pouco antes outra rolda de prensa na que aclaraban que, aínda que foi unha medida analizada e tida en conta, desde a entidade non se realizou unha convocatoria en firme para este peche patronal a nivel galego, algo que si decidiu a Federación Provincial da Coruña.
"Desde Hostalaría de Galicia non convocamos un paro para o luns, que si estaba na nosa mente para deixar patentes as dificultades polas que estamos a atravesar", dixo o presidente de Hostalaría de Galicia e representante da Federación de Lugo, Cheché Real. Máis en concreto, Real explicou que esta opción se debateu nos órganos da entidade, pero que, finalmente, optouse por non convocalo en espera dos pasos que o Goberno central dea esta semana en materia de prezos da enerxía. Incluso a Federación Provincial da Coruña, a primeira que convocou este peche, optou agora por aprazalo mentres espera o movemento do Executivo central.
Con iso dáse o paradoxo de que en cidades como Santiago, hostalaría.gal convoca o paro, mentres que Hostalaría Compostela se opón; ou Pontevedra, onde a provincial mantivo a súa negativa ao peche mentres Hoempo o practica.
INFLACIÓN E RESTRICIÓNS
Entre os problemas que aburan ao sector, Cheché Real mencionou unha "inflación galopante", así como as restricións da pandemia que aínda permanecen presentes e que lles impiden "traballar ao 100 por cen". A isto, continuou, "únese agora a subida da enerxía e carburantes, que afecta as nosas empresas e a toda a cadea de valor", así como a falta de produtos, que os obriga a "tirar de almacén".
