Alfabetización mediática e estímulo da lectura, entre as claves do novo Plan de Bibliotecas

A ampliación e renovación de espazos e fondos, o fomento da creatividade, as metodoloxías innovadoras ou o estímulo á lectura son algunhas das claves do novo Plan Lía (Lectura, Información, Aprendizaxe) de bibliotecas escolares. Así o dixo o conselleiro de Cultura, Román Rodríguez, que participou este venres nos Encontros do Plan de Mellora de Bibliotecas Escolares, un marco no que presentou este novo plan que guiará todas as actuacións nestes espazos ata o ano 2025. Será aprobado no Consello da Xunta da próxima semana.

No transcurso da súa intervención, o titular do departamento educativo da Xunta destacou a excelencia das bibliotecas escolares galegas, "que obteñen puntuacións superiores á media estatal na maior parte das dimensións contempladas nos estudos nacionais", destacando en ítems como a calidade dos espazos de aprendizaxe, as actividades relacionadas co tratamento da información e competencias dixitais ou a formación en diversidade e igualdade.

"A isto súmanse os bos resultados obtidos no Informe PISA, onde Galicia é líder en ciencias e matemáticas, pero no que tamén é a terceira Comunidade en nivel de lectura, de novo referente a nivel nacional", incidiu Román Rodríguez. En canto ao novo plan, explicou que "prioriza os recursos innovadores e o significado dos espazos como elementos clave do novo modelo educativo", no que tanto a adquisición de competencias dixitais como a formación en igualdade "representan alicerces fundamentais", abordando "con máis ambición" a atención á diversidade, entre outros factores.

SETE ÁREAS CRAVE

Para iso, a nova estratexia constrúese sobre sete puntos ou áreas clave, como son o crecemento da rede de bibliotecas escolares de Galicia e a renovación dos seus recursos; a biblioteca social, incidindo nunha maior inclusión; a construción de redes de colaboración, avaliación e comunicación entre os axentes da sociedade lectora; o uso das bibliotecas como laboratorios de creatividade na aprendizaxe; o estímulo da lectura entre toda a comunidade educativa; a alfabetización mediática e informacional e a innovación metodolóxica formativa, impulsando novas pedagoxías ao redor da propia biblioteca.

Cada un deste sete puntos desenvolveranse en diferentes liñas de actuación, que inclúen o reforzo de proxectos de éxito neste ámbito como son Biblioteca Creativa, que supón a dotación dun espazo de creación e experimentación a través do que se estimula a iniciación do alumnado de Infantil e Primaria no campo do pensamento computacional; ou Radio na Biblio, polo que se dota ás bibliotecas dun laboratorio de radio.

Biblioteca escolar. - Arquivo