O Goberno enviará outro avión con material ofensivo e unha ambulancia blindada a Ucraína

Este luns, 28 de marzo, sairá un avión A-400 do Exército do Aire con material ofensivo para a lexítima defensa de Ucraína, segundo informou o Ministerio de Defensa. Ademais, o martes sairá tamén outro A-400 cunha ambulancia blindada, BAE Systems Land Systems OMC, do Exército de Terra, para axudar a evacuar persoas feridas as cidades máis afectadas pola guerra.

Este último voo tamén transportará 54 palés (83 metros cúbicos) de medicamentos e material sanitario procedente do Centro Militar de Farmacia da Defensa (CEMILFAR) e do Hospital Gómez Ulla. A ministra de Defensa, Margarita Robles, xa avanzou que nos primeiros días da semana que vén sairá un novo avión con material ofensivo para Ucraína, así como unha ambulancia blindada para axudar a sacar aos feridos que hai en Mariúpol.

"Imos enviar unha ambulancia blindada para axudar os cidadáns de Mariúpol. Como sempre, farémolo con prudencia e discreción. Faise un esforzo importante para levalo a un país próximo a Ucraína e estamos a responder sempre ás peticións que nos fai Ucraína, como esta de ambulancia", manifestou a ministra de Defensa. Esta ambulancia foi comprada no ano 2007 polo Ministerio de Defensa para o seu emprego en Afganistán, adquirida por medio da empresa Santa Bárbara.

En canto ao envío de máis tropas, Robles afirmou que "en principio non está previsto". Neste sentido, sinalou que España "está sempre a disposición do que diga OTAN, porque é un país comprometido con OTAN e nas medidas que pidan algún reforzo achegaríase", pero "neste momento non está previsto".