O presidente do Parlamento recoñece a "dificultade" para o PPdeG de substituír a Feijóo

O presidente do Parlamento de Galicia, Miguel Santalices, recoñeceu que será "difícil" substituír a Alberto Núñez Feijóo cando asuma as súas responsabilidades como líder do PP a nivel estatal, pero asegura que o proceso "sairá ben". Nunha entrevista concedida a Cadena Ser Galicia este domingo, Santalices encomiou a xestión do presidente da Xunta, que considera creou "escola".

É por ese motivo que espera que o seu sucesor, ou sucesora, siga o ronsel marcado por Feijóo, "garantía de éxito", aínda que evitou dar nomes ou mesmo prazos. "Todo arrincará cando o presidente presente a súa dimisión. Aí comezaremos unha rolda de consultas cos grupos", explicou Santalices, que comentar estar "expectante" ante o inicio do proceso.

O presidente da Cámara galega ve "máis posibilidades de que saia ben que mal" a sucesión de Feijóo, xa que se meditou " e reflexionado pausadamente". "Todo é difícil, pero facendo as cousas con rigor, minuciosamente, sae ben", comentou.

A pesar da seguridade mostrada, o presidente si recoñeceu experimentar unha sensación "agridoce", de "orfandade", coa marcha de Feijóo. "Doume conta da necesidade de facer un esforzo desde o punto de vista organizativo e do que ten que facer o propio Feijóo no persoal, pero a situación do partido a nivel nacional necesitaba deste sacrificio", indicou.

Santalices cre que "os galegos tamén o entenden", aínda que vaia "en detrimento de ter a un home do prestixio e categoría de Feijóo, co que nos vai de marabilla". "Hai que botar unha man cando fai falta. Os galegos sempre fomos así", resolveu Santalices. Respecto das posibilidades da oposición para chegar á presidencia da Xunta tras a marcha de Feijóo, o presidente sinalou que "haberá que velo". "Non te fíes dos inimigos pequenos", chanceou, defendendo ademais que iso "fai grande a Feijóo", posto que "recoñecen implicitamente que ían perder sempre contra el".

VISIBILIDADE DO PARLAMENTO

Doutra banda, Santalices abordou o papel da Cámara galega, "cun papel sempre relevante no que incumbe á política autonómica" e, ultimamente, tamén a nivel estatal. "As situacións do país teñen que ter reflexo no Parlamento autonómico", opinou. "Feijóo sempre é unha garantía, cos seus comentarios e discursos de profundidade e claridade exemplar. É normal que iso teña certa repercusión na política nacional, e iso prestigia ao Parlamento", sinalou.

Santalices defendeu a utilidade da Cámara galega e o enorme esforzo que se está facendo por darlle visibilidade. Nesta liña, aseverou que o acto de conmemoración do aniversario de promulgación do Estatuto de Autonomía, que se celebrará en dúas semanas, é "moi necesario". "Debémoslle moito", comentou, encomiando o traballo de institucións como o Consello de Contas, de Cultura ou o Valedor do Pobo.

Miguel Santalices. EP | Fonte: PARLAMENTO DE GALICIA - Archivo