Galicia reivindica a Laxeiro cunha mostra que chegará a París, Madrid, Santiago e Lalín
"Imos traballar para que esta exposición axude a situar a obra de Laxeiro no lugar que lle corresponde na historia da pintura española do século XX", di o conselleiro de Cultura, Román Rodríguez.
Por Europa Press / Redacción | Santiago de Compostela | 28/03/2022 | Actualizada ás 19:00
O conselleiro de Cultura, Román Rodríguez, presentou este luns na Real Academia de Bellas Artes de San Fernando, xunto coa conselleira de Cultura da Comunidad de Madrid, Marta Rivera de la Cruz, a exposición 'Foi un home. Laxeiro en América (Buenos Aires, 1950-1970)', mostra que se exhibirá en París, Madrid, Santiago de Compostela e Lalín para homenaxear o pintor.
O Goberno galego, a través da Fundación Cidade da Cultura, e en colaboración co Concello de Lalín, organiza esta exposición no marco do Ano Laxeiro, despois de que a Real Academia Galega de Belas Artes decidise dedicar o Día das Artes deste 2022 ao pintor galego máis relevante do século XX. A proposta conta con apoio da Xunta e de institucións tan relevantes como a Real Academia de Bellas Artes de Madrid, na que se formou o pintor, o Instituto Cervantes ou a Embaixada de España en Francia.
Durante a presentación, Román Rodríguez agradeceu "a acollida nunha das institucións artísticas con máis historia de España, especialmente significativa na formación e evolución do propio Laxeiro".
Neste sentido, indicou que a retrospectiva busca divulgar o seu legado sobre todo fóra de Galicia, pois aquí xa é considerado o gran pintor do século pasado e goza do afecto e recoñecemento de toda a sociedade. "Imos traballar para que esta exposición axude a situar a obra de Laxeiro no lugar que lle corresponde na historia da pintura española do século XX", subliñou o conselleiro.
O artista Antón Lamazares realiza a peza conmemorativa da exposición, "unha obra que representa a alegría e celebración polo Ano Laxeiro, a figura máxima da pintura e a alma da nosa terra", explicou.
A estrea da exposición terá lugar no Museo Ramón María Aller de Lalín, onde permanecerá do 6 de abril ao 5 de xuño. A seguinte estancia será na Real Academia de Bellas Artes de San Fernando (Madrid) do 22 de xuño ao 24 de xullo. De volta en Galicia, o Museo Centro Gaiás da Cidade da Cultura de Galicia acollerá a mostra do 29 de setembro ao 18 de decembro. Terminará o seu periplo, xa no 2023, do 19 de xaneiro ao 26 de febreiro e grazas ao apoio da Embaixada de España en París, no Instituto Cervantes da capital francesa.
