A Deputación de Pontevedra pon en marcha o corpo provincial de inspección de residuos
Oferta aos municipios axudas para elaboración de novas normativas de residuos e transmitir a información local sobre residuos á Xunta.
Por E.P. | SANTIAGO DE COMPOSTELA | 29/03/2022 | Actualizada ás 13:13
A presidenta da Deputación de Pontevedra, Carmela Silva, e o vicepresidente César Mosquera mantiveron este martes un encontro de traballo no Salón de Plenos do Pazo Provincial cos 22 concellos interesados na posta en marcha do corpo provincial de inspección de residuos do Plan Revitaliza para concretar fórmulas de colaboración, as competencias, implicacións e necesidades.
César Mosquera advertiu que coa nova normativa "se abandona definitivamente o 'buenismo' e se supera a fase de voluntariedade para pasar á fase de obrigatoriedade". Así, transmitiron que a Deputación quere dar unha resposta coordinada ante o novo marco lexislativo sobre residuos que supón, en palabras de Mosquera, "unha auténtica revolución" que impón aos concellos "esixencias radicais" baixo ameaza de sanción. Isto obriga a ter un servizo municipal de control ademais doutros requirimentos dos que ata agora os gobernos locais tampouco se tiñan que facer cargo.
Debido a que os labores de control sobre os residuos municipais só poden desenvolverse por parte de persoas funcionarias de carreira ou por axentes da Policía Local, son moitos os concellos que detectaron posibles problemas para afrontar as novas esixencias. Así, a Deputación de Pontevedra "tende a man" aos concellos da provincia para que a través do Revitaliza vaian "polo camiño que marca a lei". Deste xeito, haberá novas liñas de axudas, darase asesoramento, e crearase este corpo de control e inspección.
APOIO
Carmela Silva destacou que con esta reunión se adiantan "á repercusión que poida ter a nova lexislación no mundo local", de modo que a Deputación de Pontevedra vai pór a disposición dos 22 concellos (con 234.896 habitantes) "non só un instrumento de apoio, senón tamén poder aproveitar todo o positivo desta transformación que se vai dar na xestión de residuos". Pontevedra e Vigo disporán de medios propios para esa tarefa.
Segundo destacou César Mosquera, tenden "a man aos concellos que poidan ter problemas para levalo a cabo" a través dunha fórmula de encomenda de xestión mediante convenio bilateral e baixo maioría absoluta do Pleno. A Deputación achegará máis do 50% do custo do servizo. Están adheridos á proposta de participar no novo corpo de inspección da Deputación os concellos da Lama, Barro, Poio, Meaño, Meis, Vilagarcía, Bueu, Cangas, Moaña, Valga, Baiona, Gondomar, Mondariz Balneario, Ponteareas, Salvaterra, O Rosal, Tomiño, Redondela, Pazos de Borbén, Soutomaior, Salceda e Silleda.
A proposta do goberno provincial consiste en que a Deputación creará un corpo de inspección que dará servizo aos concellos que estean interesados e fagan o encargo de xestión. Será un sistema parecido ao que nestes momentos os municipios fan coa recadación municipal, que derivan ao ORAL.
