Galicia mantense á cabeza na vacinación pediátrica contra a covid-19
Os menores de 12 anos coa pauta completa son xa o 55,1 por cento, mentres que a media estatal sitúase no 38,2%.
Por Europa Press / Redacción | Santiago de Compostela | 01/04/2022 | Actualizada ás 16:49
Galicia mantense á cabeza da vacinación pediátrica contra a covid-19 en España --de menores de 12 anos-- co 55,1 por cento da súa poboación con pauta completa, mentres que a media estatal sitúase no 38,2%.
Así se reflicte no informe actualizado este venres, 1 de abril, polo Ministerio de Sanidade relativo á vacinación ata o pasado 30 de marzo, con rexistros desde o 27 de decembro de 2020.
En concreto, en Galicia contan cunha dose da vacina contra a Covid-19 133.333 menores de cinco a 12 anos dunha poboación diana de 177.577, que supoñen o 75,1 por cento, mentres que a media estatal sitúase no 53,4%.
E no conxunto de Galicia completaron a dobre pauta ata o 30 de marzo 97.868 menores da poboación pediátrica diana, o que a sitúa á cabeza das comuidades, seguida por Castela e León, co 53,1%. Con máis do 50% destacan tamén as comunidades autónomas de Estremadura (52,7%) e Asturias (50,6%), mentres que a media estatal redúcese ao 38,2%.
