Xulgan a seis lucenses que extorsionaron a dúas persoas con publicar fotos súas espidas

Fixeron crer aos pais dunha das vítimas que tiña débedas de xogo e recibía ameazas dun grupo mafioso. Estafaron 58.000 euros

Por Europa Press / Redacción | Lugo | 02/04/2022 | Actualizada ás 16:49

Comparte esta noticia

A Audiencia Provincial de Lugo xulga o martes e mércores a seis persoas acusadas de extorsionar a dous veciños, aos que ameazaron con publicar fotos súas espidos se non lles daban diñeiro. Así mesmo, fixéronse pasar por grupos mafiosos que supostamente ameazaban a unha das vítimas para subtraer aos seus pais 58.000 euros.

A Garda Civil investiga extorsións a usuarios de internet
A Garda Civil investiga extorsións a usuarios de internet | Fonte: Garda Civil.

Segundo recolle o escrito de acusación, os feitos remóntanse a 2013, cando o principal acusado presentou a outra das procesadas a un amigo, con quen ela estableceu conversa a través de Internet, "conseguindo que lle enviase fotos súas espida". A instancia do acusado, primeiro ela e logo outra das procesadas, que tamén conseguiu fotos de espidos da vítima, pedíronlle varias cantidades de diñeiro a cambio de non facer públicas estas fotografías.

Posteriormente, tamén a instancias do principal procesado, outros dous acusados fixéronse pasar por prestamistas membros de grupos mafiosos aos que, segundo contara a vítima aos seus pais, debía diñeiro derivado de débedas de xogo e prostíbulos. Baixo ameazas, os pais da vítima entregaron aos acusados 58.700 euros, "que constituían case a totalidade dos seus aforros".

Xa en 2017, o principal acusado coñeceu nun ximnasio a un home ao que presentou de novo a unha das súas amigas. A través da aplicación whatsapp, fíxose cunha foto súa espido para logo ameazalo reclamándolle diñeiro.

O Ministerio Público considera os feitos constitutivos dun delito continuado de chantaxe e dun delito de coaccións, sendo autor o principal acusado e cooperadores necesarios os outros cinco procesados. Para o primeiro pide unha pena de 10 anos de cárcere máis o pago dunha multa, mentres que para o resto pide penas entre os 7 e os 8 anos de prisión.

Comparte esta noticia
¿Gústache esta noticia?
Colabora para que sexan moitas máis activando GCplus
Que é GC plus? Achegas    icona Paypal icona VISA
Comenta