O goberno de Santiago defende o seu traballo na acollida de refuxiados "sen querer saír na foto"

O goberno de Santiago de Compostela defendeu as tarefas de coordinación con outras administracións e con servizos municipais para organizar a recepción e acollida de refuxiados procedentes da guerra de Ucraína, un traballo levado a cabo "sen ningunha pretensión de saír na foto".

Así o indicou o concelleiro de Relacións Institucionais, Sindo Guinarte, en resposta a unha pregunta formulada pola edil do PP Beatriz Cigarrán no pleno municipal celebrado este martes sobre as accións do executivo local para acoller refuxiados.

Neste sentido, o tamén portavoz do grupo socialista na capital galega sinalou que o goberno participou na reunión convocada pola Fegamp para coordinar a acción das entidades municipais coas administracións central e autonómica.

Tamén citou as tarefas para organizar a recepción aos autobuses chegados das fronteiras ucraínas e os contactos co Servizo Galego de Saúde para a atención sanitaria destas persoas.

Así mesmo, apuntou que a Policía Local prestou axuda para axilizar os trámites de regularización da situación dos refuxiados, á vez que Santiago estableceu contactos con outros concellos da zona para buscar un fogar a estas persoas.

Todo iso "sen ter intención de saír na foto", recalcou Guinarte, quen incidiu en que o goberno local "está, estivo e estará a disposición" do Plan Nacional de Acollida.