O PSdeG ve unha "falta de respecto" que Néstor Rego non aplaudise a Zelenski

Parlamentarios e senadores do PSdeG cargaron contra o deputado do BNG no Congreso Néstor Rego por non aplaudir a intervención na Cámara baixa do presidente ucraíno, Volodímir Zelenski, o que consideran "unha falta de respecto ás verdadeiras vítimas desta situación, o pobo ucraíno".

Nun comunicado, os representantes do PSdeG nas cámaras estatais manifestan a súa "admiración" cara ao pobo de Ucraína e o seu presidente, á vez que reproban a "actitude" de "forzas políticas como o BNG" pola súa "equidistancia e posición negacionista da traxedia".

"A actitude mostrada polo deputado do BNG supón unha falta de respecto ás verdadeiras vítimas desta situación, que é o pobo ucraíno, e o único que fai é poñer á forza nacionalista galega ao lado de grupos antisistema e euroescépticos como é a CUP", conclúen os deputados e senadores socialistas.

Cuestionada sobre o xesto de Rego, que si se levantou do seu asento ao termo da intervención pero non aplaudiu ao presidente ucraíno, a portavoz nacional do BNG, Ana Pontón, subliñou que a formación frontista condena a invasión rusa e aposta por que "se acelere todo o que sexa necesario" para parar a guerra. "Onte (martes) o BNG estivo no Congreso escoitando a intervención do presidente de Ucraína, con todo o respecto á dor que sofre ese pobo", manifestou este mércores Pontón a preguntas dos xornalistas no Parlamento de Galicia.

"Que quede moi clara a condena do BNG á invasión e, sobre todo, a aposta porque se acelere todo o que sexa necesario para parar unha guerra cruenta", aseverou a portavoz nacionalista, que pide que se investigue o ocorrido na localidade ucraína de Bucha para que feitos como os que mostran as "horribles" imaxes "non queden impunes".

O deputado do BNG no congreso, Néstor Rego. A. Pérez Meca - Europa Press