Pontevedra recupera a Mostra de Teatro Universitario doce anos despois
Será entre os días 20 e 28 de abril no Pazo da Cultura.
Por E.P. | Pontevedra | 07/04/2022 | Actualizada ás 19:12
A Mostra Internacional de Teatro Universitario (Miteu) regresa a Pontevedra doce anos despois da súa última edición. Será entre os días 20 e 28 de abril no Pazo da Cultura, onde poderán verse as montaxes realizadas nas aulas teatrais dos tres campus da Universidade de Vigo.
Serán catro funcións con entrada gratuíta e programadas para as 21.00 horas. A Miteu abrirase o mércores 20 coa obra 'A Casa da forza', da aula de Teatro da Universidade de Santiago de Compostela, baseada nun texto de Angélica Liddell que aborda o feminismo no século XXI desde a crítica e o desencanto.
O Grupo Maricastaña da aula de teatro universitaria de Ourense representará o xoves 21 de abril a peza 'O Parke do Crepúsculo', na que se abordan os motivos que levan á xente a ocupar unha casa deshabitada e convídase a unha reflexión sobre a xustiza social. Trátase dunha inspiración libre da obra de Paul Auster 'Sunset Park', publicada en 2010 e na que se contan as relacións e a vida dun grupo de persoas que viven como okupas nunha casa abandonada en Sunset Park, Brooklyn.
O mércores 27 de abril a aula de teatro universitaria de Vigo presentará 'Emigrados', unha obra realizada a partir dos textos de Anxos Sumai, Candido Pazó, Sonia Torre, Suso de Toro e Xosé Manuel Pazos que repasará diferentes situacións que se dan na historia das persoas cando se converten en inmigrantes, a través da ironía, a axilidade da linguaxe artística e un punto de vista de conciencia colectiva.
Pechará esta edición da Miteu o xoves 28 de abril a aula de teatro universitaria de Pontevedra coa escenificación de 'Nosa Señora das Nubes'. A obra é orixinal do autor arxentino Arístides Vargas, quen tivo que exiliarse en Ecuador fuxindo da ditadura do xeneral Videla. Sobre esta base, escribe sobre o exilio nun ton metafórico que mestura realismo máxico e memoria.
"Despois de doce anos, o teatro universitario volve a Pontevedra, que é unha cidade onde tiña xa un percorrido moi importante nos anos 70 e 80", destacou o vicerreitor do campus, Jorge Soto, na presentación.
