Traballadores urxen unha reunión ao fondo TPG para que aclare se quere vender as antigas plantas de Ferroatlántica

O presidente do comité de empresa de Xeal, Alfonso Mouzo, urxe unha reunión co fondo TPG, dono das 10 plantas hidroléctricas nos ríos Xallas e Grande que eran propiedade de Ferroatlántica e das fábricas de ferroaleacións de Cee-Dumbría --cuxo nomee pasou a ser o de Xallas Electricidad y Aleaciones (Xeal)--, para que aclare se ten intención de vender estes activos.

Segundo informa este xoves 'El Economista', o fondo de investimento estadounidense TPG Sixth Street Partners puxo á venda as dez plantas hidráulicas que Ferroatlántica tiña en Galicia xunto ás fábricas de ferroaleacións de Cee e Dumbría. Asegura que a operación espertou o interese de ao redor de oito posibles compradores.

No entanto, fontes de Xeal negan a intención de venda, posto que "a compañía segue centrada no seu plan de investimentos".

O presidente do comité de Xeal sinala que, "esta mesma mañá" de xoves, os traballadores pediron unha reunión informativa coa compañía e coa Xunta de Galicia, tanto co vicepresidente económico, Francisco Conde, como coa conselleira de Infraestruturas, Ethel Vázquez, como departamento responsable de Augas de Galicia.

Mouzo denuncia que en 2019 "fixeron unha operación fraudulenta" despois de que a xustiza impedise a segregación da actividade hidráulica das ferroaleacións. "Seguimos dependendo de Ferroatlántica, pero estamos fóra del", resume, o que supón que: "Ferroatlántica pon antes a traballar os fornos nas fábricas que ten en España e en toda Europa antes que os nosos". Esta xente só se vén a lucrar cos beneficios caídos do ceo", apostila.

"O grupo Ferroatlántica é o que manexa a produción nas fábricas, de feito corre cos gastos todos nas fábricas, incluídas as nóminas", afirma. "Xeal mándalle unha factura ao acabar o mes das nóminas e o grupo Ferroatlántica ingresa a Xeal as nóminas, é unha auténtica fraude", agrega. "Estes voitres americanos é ao que veñen: a facer limpa e deixar un deserto industrial", recrimina.

A isto únese que, desde o 1 de xaneiro, os traballadores padecen "condicións inferiores" ao convenio colectivo que lles corresponde, segundo se queixa, pero "a Xunta mira para outro lado". Así mesmo, esixe que o Goberno galego demande un plan de viabilidade que manteña postos de traballo, xa que a actividade industrial "vai a menos", pois se pasou de 293 empregados en todo o complexo en 2019 a 260 actualmente, di.

A XUNTA NON TEN COMUNICACIÓN

Pola súa banda, fontes da Xunta indican que "non teñen constancia desta operación", pois "a empresa non se puxo en contacto para informar".

Nesta liña, sostén que "o obxectivo segue sendo garantir a continuidade da actividade industrial e estar ao carón dos traballadores en defensa dos postos de traballo".

"A Xunta de Galicia seguirá actuando co mesmo rigor e a mesma transparencia que mantén desde o principio, tal e como fixo en 2017, cando se dixo non á segregación. A posición do Goberno galego é clara: manterse vixiante para que se cumpran as condicións fixadas nas concesións, haxa ou non haxa venda", aseveran estas mesmas fontes.