Repuntan a 583 os ingresos e aumentan os contaxios e casos activos de Covid

Os pacientes hospitalizados pola Covid-19 no conxunto de Galicia incrementáronse nunha vintena con respecto ao día anterior ao situarse en 583 --implican 21 máis--, tras subir os novos contaxios a 1.206 --medio milleiro máis que o día anterior-- e os casos activos a 11.672 --supoñen 166 máis--. A taxa de positividade tamén experimentou un aumento ata o 24,83%.

Segundo os datos actualizados este martes pola Consellería de Sanidade, con rexistros ata as 18,00 horas do luns, recollidos por Europa Press, aumentan a 15 as persoas hospitalizadas en UCI pola Covid-19 en Galicia --unha máis-- e increméntanse a 568 as ingresadas en unidades convencionais --20 máis--, mentres que 11.089 persoas se atopan en seguimento no seu domicilio. Hai unha semana --o martes 5 de abril-- había 505 hospitalizados, 16 deles en críticos.

Por áreas sanitarias, a presión hospitalaria aumenta en seis das sete e unicamente se alivia na de Ourense, na que segue un paciente ingresado pola Covid en UCI e descenden a 80 os hospitalizados noutras unidades --dous menos--. Por contra, na área da Coruña e Cee aumentan a cinco os pacientes en críticos pola Covid-19 --un máis-- e a 131 os ingresados noutras unidades --seis máis--; mentres que na de Santiago e Barbanza se manteñen cinco en UCI e soben a 85 os hospitalizados noutras unidades --sete máis--.

No caso da de Pontevedra e O Salnés mantense un paciente Covid en UCI e aumentan a 80 os ingresados noutras unidades --catro máis--; mentres que na de Vigo segue un en críticos e hai 92 noutras unidades --dous máis--. Na área de Ferrol continúan dous pacientes ingresados pola Covid en UCI e aumentan a 51 os hospitalizados noutras unidades --dous máis--; mentres que a de Lugo mantense como a única de Galicia sen críticos e rexistra 49 noutras unidades --un máis--.

AUMENTAN OS CASOS ACTIVOS

Tras o descenso dos casos activos da xornada anterior, volven aumentar segundo avanza a Semana Santa ao situarse en 11.672, que supoñen 166 máis, ao haber máis contaXios (1.206) que altas (1.032), ao que se suman oito falecementos.

Por tanto, fréase a tendencia descendente continua rexistrada tras a entrada en vigor o pasado 28 de marzo de novo protocolo de vixilancia da Covid-19 polo que xa non se contabilizan os autotest e non se fan illamentos salvo excepcións. Hai unha semana --o martes 5 de abril-- había 12.636 infeccións activas.

As infeccións activas aumentan en seis das sete áreas sanitarias, coas de Ourense (+44) e Santiago e Barbanza (+44) á cabeza, seguidas de Lugo (+43), Pontevedra e O Salnés (+29), Ferrol (+18) e Vigo (+11), mentres que descenden na da Coruña e Cee (-24). Por tanto, con máis infeccións activas continúa a área da Coruña e Cee, con 2.190; seguida da de Vigo, con 2.186; Santiago e Barbanza, con 1.795; Lugo, con 1.659; Ourense, con 1.469; Pontevedra e O Salnés, con 1.289; e á cola segue a de Ferrol, con 1.070.

Segundo o último informe actualizado polo Ministerio de Sanidade este pasado venres, 8 de abril, adaptado ao novo sistema de vixilancia da Covid-19 centrado en poboación vulnerable, a incidencia acumulada a 14 días en Galicia en maiores de 60 anos sitúase en 775,53 casos por 100.000 habitantes, mentres que a media estatal se reduce a 420,17.

MÁIS CONTAXIOS

Os novos contaxios ascenden a 1.206, que supoñen medio milleiro de novos casos abertos nas últimas 24 horas tras os 698 cos que arrincou esta semana --entre os que xa non se contabilizan os autotest positivos polo novo protocolo estatal de control e vixilancia deste coronavirus e non se fan probas de diagnóstico a poboación en xeral--. O martes pasado --5 de abril-- houbo 928.

Deste xeito, os contaxiados ascenden en Galicia a 561.061, dos cales 129.720 corresponden á área de Vigo; 116.808, á da Coruña e Cee; 88.585, á de Santiago e Barbanza; 67.335 á de Ourense; 64.411, á de Pontevedra e O Salnés; 59.991 á de Lugo; e 33.383, á de Ferrol. Este pasado luns leváronse a cabo 4.692 PCR, o que eleva a 3.811.339 as probas deste tipo feitas desde o inicio desta pandemia en toda Galicia, e 2.738 test de antíxenos, que sitúan en 1.645.955 os feitos en total, o que supón 4.692 entre ambas.

En canto á taxa de positividade --número de PCR positivas por cada 100 realizadas-- aumenta ao 24,83 por cento, tras comezar esta semana no 21,57%. Así, mantense por encima do 5% que marca a OMS para dar por controlada a pandemia.

VÍTIMAS E CURADOS

As vítimas da pandemia pola Covid-19 en Galicia aumentan a 3.262, despois de notificar Sanidade este martes outros oito falecementos rexistrados en tres xornadas pasadas, todos de persoas con patoloxías previas. En concreto, o 8 de abril morreron dous homes de 72 e 73 anos na área sanitaria de Vigo, outro de 68 anos na de Ferrol e unha muller de 87 na de Lugo, A Mariña e Monforte.

Ademais, o día 9 de abril faleceu unha muller de 86 anos de idade na área sanitaria de Vigo e un home de 88 anos na de Lugo, A Mariña e Monforte de Lemos. E o 10 de abril morreu unha muller de 82 anos de idade na área sanitaria de Ferrol e perdeu a vida un home de 78 anos na de Lugo, A Mariña e Monforte.

Mentres, 546.184 persoas curáronse da Covid-19 desde o inicio desta crise sanitaria, despois de recibir a alta outras 1.032 na última xornada.

VACINACIÓN

Doutra banda, a poboación con pauta completa contra a Covid-19 no conxunto de Galicia aumenta ao 93,45 por cento da poboación, tras ser administradas outras 850 doses este pasado luns. Desas 851, un total de 218 foron administradas para completar pautas, polo que aumentan a 2.523.277 as persoas co proceso finalizado en Galicia, que supoñen un 93,45 por cento do conxunto da súa poboación.

En canto ao proceso de vacinación infantil --os datos da Consellería de Sanidade non separan o grupo etario principal da poboación pediátrica en fase de inmunización de 5 a 11 anos-- foron vacinados ata a data 118.681 menores de 10 a 14 anos de idade --11 máis-- e 89.980 de cinco a nove anos --dez máis--.