Sánchez vincula o PP de Feijóo coa corrupción un día despois das enquisas que apuntan que pode perder

O presidente do Goberno, Pedro Sánchez, acusou hoxe ao PP de non resolver os seus problemas coa corrupción nin coa ultradereita e instou á nova dirección nacional dos 'populares' a pronunciarse sobre os contratos das máscaras do concello de Madrid e da Comunidade que están nos tribunais. Ademais, rexeitou a baixada de impostos que propón o novo líder do PP advertindo de que os que os queren baixar están a anunciar recortes como fixeron na crise financeira.

Así o afirmou durante unha entrevista en Antena 3, recollida por Europa Press, na que tamén desdeñou os datos que dan nas enquisas ao PP de Alberto Núñez Feijóo, ao asegurar que eses datos xa os cultivou nas sondaxes o expresidente 'popular' Pablo Casado. En cando á celebración das eleccións xerais, deixou claro que non ten ningunha intención de adiantalas e serán "en tempo e forma", a finais de 2023.

O xefe do Executivo aproveitou unha pregunta sobre a baixada de impostos para atacar ao PP asegurando que ten tres problemas e o primeiro deles, dixo, chámase "corrupción". Así se referiu a a investigación que están a levar a cabo os tribunais sobre algúns contratos de compra de material sanitario do Concello e da Comunidade de Madrid.

"Eu, á dirección nacional do PP aínda non lle escoitei dicir absolutamente nada do que estamos a ver en Madrid, nin de Ayuso, nin de Almeida", espetou Sánchez quen tamén criticou ao alcalde da capital por dicir que o avogado que presentou a querela contra el está vinculado ao PSOE. Segundo o presidente do Goberno, dicir iso "non é de recibo" e asegurou que lle lembra a cando estalou o caso Gürtell e o PP dicía que era unha trama contra o PP. "Daquela a Xustiza dixo que era unha trama do PP", remachou.

FEIJÓO

O líder do PP, Alberto Núñez Feijóo asegurou, sobre isto, que é un "sarcasmo" que o xefe do Executivo, Pedro Sánchez, dea "leccións de honorabilidade" ao seu partido en relación con caso das máscaras cando o Goberno ten "catro altos cargos imputados" pola compra de material sanitario durante a pandemia. Dito isto, subliñou que el non ten "ningunha dúbida sobre a honestidade dos seus compañeiros", en alusión ao alcalde madrileño, José Luís Martínez-Almeida.

Tras precisar que se trata dun alto cargo do Ministerio de Facenda e tres altos cargos do Ministerio de Sanidade, indicou que o feito de que o Goberno "dea instrucións ou exemplos a outras institucións é cando menos un sarcasmo" porque "non hai compañeiros" do PP que "estean imputados" por este caso.

Por todo iso, Feijóo criticou que "hoxe o presidente do Goberno tente dar leccións sobre honorabilidade". "Mire, a honorabilidade demóstrase todos os días. Non creo que sexa un bo exemplo dar leccións de honorabilidade o Goberno que ten catro altos cargos imputados pola compra de material sanitario durante a pandemia", agregou.

O presidente dos 'populares' expresou a súa "tranquilidade" e "serenidade" ante as informacións que se están publicado sobre o caso das máscaras en Madrid. "Non teño ningunha dúbida sobre a honestidade dos meus compañeiros. Se a tivese, diríao. Como non a teño, dígoo con igual de franqueza. Non teño dúbidas respecto diso", concluíu.