Un axente da Garda Civil resulta ferido nun incendio en Neda
Tivo que recibir asistencia sanitaria por unha afectación de carácter leve.
Por E.P. | SANTIAGO DE COMPOSTELA | 19/04/2022 | Actualizada ás 13:52
Unha muller e un axente da Garda Civil que a axudou recibiron asistencia sanitaria na mañá deste martes tras declararse un incendio no interior dun piso da Avenida Castelao no municipio coruñés de Neda. Segundo informou o 112 Galicia, ambos presentaban lesións de carácter leve, tal e como informou o equipo médico a través do servizo de emerxencias por mor duns feitos ocorridos pasadas as 11,00 horas deste martes cando axentes da Garda Civil acudiron a un domicilio no que se producía un incendio.
Os axentes mobilizados entraron na vivenda e sacaron a unha muller con síntomas de inhalación de fume. Por iso, por parte do 112 Galicia pediuse a colaboración de Urxencias Sanitarias de Galicia-061, que tamén prestou asistencia tamén a un dos efectivos da Garda Civil. Ao lugar o 061 enviou unha ambulancia de soporte vital avanzado que levou ao Hospital Arquitecto Marcide de Ferrol á muller M.L.G.L., de 65 anos, mentres que outra ambulancia de soporte vital básico trasladou ao Hospital Juan Cardona ao home F.P.B., de 41 anos, confirmaron a Europa Press fontes sanitarias.
O incendio encargáronse de sufocalo os Bombeiros de Ferrol, co apoio de membros do GES de Mugardos. Segundo explicaron, resultou afectado un moble e roupa almacenado no interior, ademais dunha xanela e a persiana.
