Chaman á tranquilidade ante os casos de hepatite en crianzas: "Entran dentro do esperable"
A Consellería de Sanidade notificou ao Ministerio de Sanidade a detección en Galicia de dous casos de hepatite aguda infantil de orixe descoñecida.
Por Europa Press / Redacción | MADRID | 19/04/2022 | Actualizada ás 18:13
O xefe do Servizo de Pediatría do Hospital Clínico Universitario de Santiago de Compostela, Federico Martinón, lanzou unha mensaxe de "tranquilidade absoluta" sobre a hepatite aguda de orixe descoñecida en crianzas. "Os casos reportados en España entran dentro do número esperable", asegurou.
Así se manifestou este martes durante o V Seminario para xornalistas organizado por Pfizer en colaboración coa Asociación Nacional de Informadores da Saúde. "Estableceuse unha alerta, o que quere dicir que os sistemas de vixilancia epidemiolóxica funcionan", lembrou. Neste sentido, explicou que dita alerta "non foi tanto por que se produzan casos de hepatites en nenos como estes, senón pola agrupación de moitos casos nun determinado espazo de tempo e nun determinado país".
Segundo Martinón, de momento, no Estado, os casos que se reportaron oficialmente aínda son escasos, polo que, desde o punto de vista da poboación, non cre que haxa que tomar "ningún tipo de medida especial". "O sistema de Pediatría, tanto de Atención Primaria como Hospitalaria, así como de Urxencias, está alertado. Sabemos que facer no caso de que se dea un caso", reiterou.
Así, quixo lembrar que esta hepatite non garda relación ningunha coa vacina contra a Covid-19, nin tampouco co SARS-CoV-2. "A maioría dos nenos coa enfermidade nin sequera son elixibles para ser vacinados, porque a idade media de casos está por baixo dos cinco anos", informou. "No entanto, si se observou un número significativo de nenos con outros virus, concretamente con adenovirus, e esa podería ser a causa, pero hai que observalo e vixialo", finalizou.
GALICIA NOTIFICA DOUS CASOS DE HEPATITE AGUDA INFANTIL
A Dirección Xeral de Saúde Pública da Consellería de Sanidade notificou ao Centro de Coordinación de Alertas e Emerxencias Sanitarias do Ministerio de Sanidade a detección en Galicia de dous casos de hepatite aguda infantil de orixe descoñecida, que cumpren os criterios de inclusión determinados polas autoridades sanitarias.
Unha vez remitida a información, o Centro de Coordinación de Alertas fará as probas pertinentes. Un dos casos pasou a enfermidade no mes de xaneiro e outro está recuperándose actualmente.
Tras recibir a alerta sanitaria por parte do Ministerio de Sanidade, a Consellería de Sanidade iniciou unha procura activa de casos, tamén con carácter retroactivo, de persoas ingresadas no ano en curso.
Así, o sistema de vixilancia epidemiolóxica da Xunta de Galicia detectou un primeiro caso no mes de xaneiro, sendo a evolución do paciente positiva. Por outra banda, existe outro caso que se está tratando na actualidade e que evoluciona favorablemente. Galicia permanece alerta para detectar máis posibles casos.
