Yolanda Díaz valora concorrer ás eleccións sen Podemos despois das críticas de Pablo Iglesias
A vicepresidenta segunda asegura que o futuro electoral pasa por grandes coalicións pero elude concretar se será cabeza ou non dalgunha.
Por E.P. | SANTIAGO DE COMPOSTELA | 20/04/2022 | Actualizada ás 12:58
Dará o paso Yolanda Díaz? A vicepresidenta segunda do Goberno e ministra de Traballo manifestou estar de acordo coa reflexión do presidente do Goberno, Pedro Sánchez, sobre os gobernos do futuro que pasarán, previsiblemente, por manter coalicións. No seu caso particular, Díaz ten previsto iniciar un proxecto de "escoita" que se prolongará durante uns seis meses e do que sairá a súa decisión persoal de se dá o paso para liderar unha candidatura no espazo político que ocupa. Neste sentido, incidiu en que os liderados "decídeos a xente", en referencia, así mesmo, ás palabras do exlíder de Podemos, Pablo Iglesias.
Nunha entrevista na Radio Galega, recollida por Europa Press, Díaz confirmou que o proceso de "escoita" prolongarase durante seis meses e que, independentemente da "decisión" que adopte ela, o espazo no que está "a traballar vai concorrer ás eleccións". "Por iso o presidente do Goberno ten razón", dixo, en referencia a que o futuro pasa por unha "coalición progresista" ou "o modelo Feijóo coa extrema dereita".
Preguntada na entrevista por se nese espazo estará Podemos, Yolanda Díaz esquivou posicionarse ao salientar que "o que ten que saber a cidadanía, cando se faga neste proceso" é que se ela dá o paso adiante, "vai decidir a cidadanía". "A min non me elixe ninguén, xa o dixen, son libre, agradezo o recoñecemento de todas as persoas, pero vou decidir con absoluta liberdade e, por suposto, se dese un paso adiante, serei sometida a un proceso de escrutinio democrático, como faría con todo o mundo", remarcou.
ESPIONAXE POLÍTICA
A vicepresidenta segunda do Goberno, Yolanda Díaz, emprazou a coñecer as explicacións sobre a suposta espionaxe a independentistas cataláns e vascos que se comprometeu a ofrecer a ministra de Defensa, Margarita Robles; á vez que reivindicou España como un "país democrático" que, como tal, "non debe ter ningún temor" á transparencia.
Así se pronunciou a tamén ministra de Traballo en declaracións aos medios á súa chegada á Facultade de Ciencias Políticas para participar este mércores nunha conferencia sobre precaridade e o mercado laboral para as persoas novas organizado pola Universidade de Santiago de Compostela.
"España é un país democrático. E os países democráticos non deben ter ningún temor para facer gala da transparencia e de cantas aclaracións sexan necesarias", aseverou Díaz ao ser preguntada pola suposta espionaxe a responsables políticos do independentismo catalán e vasco.
Despois de subliñar que, como membro da Comisión Delegada do Centro Nacional de Intelixencia, a ampara o segredo e a confidencialidade sobre os asuntos que alí se tratan; a responsable do Executivo reiterou que corresponde á súa compañeira de goberno Margarita Robles dar explicacións sobre estes feitos.
Preguntada ante as posibles consecuencias do caso nas relacións do Goberno con socios da investidura como ERC, Yolanda Díaz remarcou que traballan "como deben facer" coas formacións políticas "do marco da investidura". Neste sentido, subliñou o seu "agradecemento" ás formacións "que fixeron posible" adoptar medidas sociais para facer fronte ás consecuencias da pandemia e, agora, para os efectos no Estado da invasión rusa en Ucraína; algo que, di, non fora posible co PP e con Vox. "O PP non acompañou ao Goberno de España en moitas decisións que demostraron que salvaron a vida da xente", incidiu a vicepresidenta, antes de reivindicar que "a política é traballar con rigor e non convertela en politiqueo".
