Os veciños do rural de Ferrol ven "inaceptable" que o saneamento non chegue antes do ano 2030

O presidente da agrupación de asociacións de veciños da zona rural de Ferrol, Manuel Sendón, asegurou que é "inaceptable" os prazos que manexa o goberno municipal para dotar de saneamento ás zonas non urbanas deste concello.

Na mañá deste venres, 22 de abril, Sendón asegurou que a nova proposta lles foi presentada por parte do alcalde, Ángel Mato, e responsables da empresa mixta de augas, Emafesa.

"Este proxecto de saneamento que no ano 2015 tiña un orzamento de 6,5 millóns de euros e un prazo de execución de cinco anos, agora ten un gasto de 10 millóns e aumenta o prazo ata os oito anos", sostén. "Non o podemos permitir, non podemos ir ao 2030 e non podemos agardar oito anos a que se faga o saneamento, polo que esiximos ao alcalde que se poña as pilas e tome o touro polos cornos", dixo.

En canto á roza e limpeza de cunetas, Sendón tamén denuncia que "nada se sabe da promesa de crear unha cuadrilla municipal para poder levar a cabo estes traballos, un dos acordos ao que chegou o goberno de Mato o grupo municipal do BNG para que estes apoiásenlles na aprobación das contas de 2021".

Segundo o tamén presidente da Asociación de veciños de Covas, "non se comprou nin un só tractor, non se iniciou o proceso para contratar traballadores, non se fixo nada de nada". "Xa non se realizaron as rozas de outono e nada se sabe das que terían que empezar en maio", sentenciou.