A unidade móbil de información para refuxiados ucraínos chega o luns a Santiago

A unidade móbil de información para refuxiados ucraínos, impulsada pola Xunta de Galicia, chega este luns a Santiago de Compostela. Así, luns, martes e venres, o punto informativo estará situado fronte á oficina da Cruz Vermella, na avenida de Lugo, e diante da sala Einsemann, na Cidade da Cultura, o mércores e xoves.

Tal e como sinalou o Goberno autonómico nun comunicado, a unidade móbil pasará esta semana na capital galega tras iniciar o seu percorrido este mércores na Coruña. Durante os próximos tres meses ofrecerá información, asesoramento e axuda á poboación ucraína nas sete cidades galegas e nas localidades que acollen un maior número de refuxiados. Conta cunha intérprete e unha traballadora social que achegarán todos os datos sobre os trámites que debe cumprimentar a poboación refuxiada e os servizos á súa disposición.

Ademais, entre outras cuestións, axudaranlles a ter información sobre como obter a documentación sanitaria que lles permita acceder ao sistema público de saúde, como escolarizar aos seus fillos, como beneficiarse dunha das 1.400 prazas de acollida que Galicia puxo a disposición do Goberno central e como acceder a cursos de formación en competencias lingüísticas para facilitar a súa inserción laboral.

Un grupo de tres nenos refuxiados ucraínos á súa chegada desde un autobús con 47 persoas ucraínas, en Santiago de Compostela. Álvaro Ballesteros - Europa Press