Galicia, terra innovadora con ansia de traspasar fronteiras: 134 patentes solicitadas no 2021

Galicia é terra innovadora e con ansias de internacionalización. O ano 2021 pechou cun total de 59 solicitudes de patentes estatais e 75 solicitudes de patentes a nivel europeo. Desta maneira, de entre todas as autonomías do Estado, Galicia colócase no sétimo e no oitavo posto respectivamente. Así o indica o informe que vén de publicar ABG Intellectual Property con datos recollidos da Oficina Española de Patentes, que apuntan un lixeiro descendo do 1,67% con respecto ao ano anterior. Porén, tendo en conta o aumento do 17,6% do ano pasado, as cifras para Galicia seguen mostrándose positivas.  

Así, tanto en solicitudes españolas como europeas, Galicia mantense preto dos seus valores máis altos dos últimos anos, segundo indica ABG Intellectual Property, que recolle tamén a meirande parte das patentes estatais solicitadas corresponden ás provincias da Coruña (30) e Pontevedra (25), ás que seguen Lugo e Ourense con dúas cada unha. 

Con todo, os números máis elevados de solicitudes de patentes atópanse a nivel europeo. "Isto denota unha preferencia da innovación galega por expandir a protección inicial dos seus desenvolvementos máis aló das fronteiras do Estado", explica Juan Arias, socio director de ABG, o que "pode percibirse como unha positiva mentalidade de internacionalización do negocio".

"A oficina de patentes europea goza de gran reputación a nivel mundial, e para as empresas galegas que teñen por obxectivo transferir ou licenciar a súa tecnoloxía, o feito de obter canto antes un informe de procura e opinión escrita sobre patentabilidade resulta fundamental, xa que representa unha ferramenta de gran valor para atraer e negociar licenzas con terceiros", explica Arias, que remarca que isto é particularmente importante para universidades e centros de investigación.

USC

De feito, en Galicia descata a actividade patentadora da Universidade de Santiago de Compostela (USC), un "referente na creación de empresas tecnolóxicas", sinala ABG, que vén de lonxe. De feito, a USC leva facendo rexistro sistemático de patentes dos seus resultados de investigación dende o ano 1989, e ata o día de hoxe, presentou en España máis de 600 solicitudes, o que supón unha media de 20-40 novas solicitudes cada ano. Neste senso, segundo os datos facilitados pola propia USC, nos dous últimos anos concedéronselle á universidade un total de 50 patentes no 2020 e 36 no 2021, contando estatais e internacionais.

FOMENTANDO A INNOVACIÓN DENDE A MOCIDADE

A actividade innovadora agroma en Galicia desde a mocidade, futura solicitadora de patentes. Dende o Parque Tecnolóxico de Galicia - Tecnópole - participan no proxecto 'Ciencia e Tecnoloxía en Feminino' no que procuran aumentar a porcentaxe de alumnas que elixen estas especialidades xa na Educación Secundaria. No marco desta iniciativa, tres alumnas galegas veñen de recibir o primeiro premio do concurso a nivel estatal 'Propostas Innovadoras aos Retos para o Desenvolvemento Sostible', impulsado pola Asociación de Parques Científicos e Tecnolóxicos de España -APTE-.

As rapazas gañadoras, Sabela Prada, Noa Vilas e Nerea Martínez, alumnas do colexio Santo Ángel de Ourense, crearon un vídeo no que propoñen a obtención de filamentos para impresión 3D a partir de botellas e envases PET. Trátase dunha solución á acumulación de plástico nos parques empresariais e tecnolóxicos que consiste nun sistema de recollida e almacenaxe de botellas e envases e a súa conversión en láminas, que se poderían destinar como material para imprimir en 3D. Segundo os seus datos, dunha botella poden extraerse 30 gramos de filamento. Proxectos coma este son, á fin, un exemplo de tantos de que Galicia tamén é sinónimo de innovación.