Igualdade urxe ao Goberno central a incluír na lei todas as violencias de xénero

A secretaria xeral de Igualdade, Susana López Abella, urxiu ao Goberno central a priorizar as modificacións legais necesarias para incluír todas as formas de violencia machista na lexislación, tanto para dotar dos "instrumentos adecuados" aos xuíces á hora de aplicar o código penal, como para a xestión de axudas que se vinculan ao recoñecemento como vítima.

López Abella compareceu este xoves ante a Comisión de Políticas Sociais da Cámara galega para informar de varios informes de violencia machista e ciberacoso, que xa transcenderon en días pasados, e referidos ao balance de 2021. Ao longo da súa intervención, mostrouse "preocupada" pola "desaparición" do calendario normativo da adaptación lexislativa prevista no Pacto de Estado contra a violencia machista e no Convenio de Istambul.

Tanto o Convenio de Istambul de 11 de maio de 2011, subscrito polo Goberno de España, como o Pacto de Estado contra a violencia sobre a muller, recollen que feitos como o ocorrido recentemente en Barro, no que unha muller foi arroiada mortalmente cando ía no seu coche por un home ao que denunciara por acoso sexan considerados como violencia de xénero.

Na súa comparecencia no Parlamento, Susana López Abella lembrou que na reunión interterritorial do pasado 31 de marzo, Galicia pediu que se "modificase" a lei para "incorporar todos os tipos de violencia de xénero" e, de feito, púxose o caso de Jéssica Méndez, a muller vítima do atropelo do home que denunciou por acoso. Neste sentido, é un "exemplo do deixamento" do Goberno nun caso que non está recoñecida como vítima machista ao non ter unha relación de parella ou análoga co agresor.

Así mesmo, trouxo o caso da moza de 20 anos de Sanxenxo que denunciou acoso e foille retirada, tras ser outorgada por un xulgado, as medidas de protección, e cuxa familia vive "aterrada". Precisamente, este xoves transcendeu a decisión xudicial de que o caso recaia no xulgado número 3 de Cambados, con competencias en violencia de xénero.

"Hai que modificar a lei orgánica, os xuíces necesitan ter un instrumento adecuado", apuntou López Abella na súa intervención, na que lamentou que, por parte do Goberno, déronse "evasivas". Pero, agregou, "na acta" quedou "esa solicitude" de Galicia.

Doutra banda, lembrou que este ano remata a vixencia do Pacto de Estado sobre violencia de xénero e que a información facilitada é que entra "nun período de reflexión". Galicia solicitou unha prórroga dun ano, porque "as vítimas non van entrar en período de reflexión", advertiu, á vez que sinalou que medidas como o bono de aluguer, que xestionan as comunidades, tampouco poden agardar. Esta cuestión, dixo, foi apoiada "por numerosas comunidades" nesa mesma reunión, na que se solicitou ademais un calendario e programa de traballo para a renovación do pacto, posto que se os fondos acaban chegando a final de ano e non teñen o carácter plurianual, despois non se "poden executar".