Por E.P. | SANTIAGO DE COMPOSTELA | 30/04/2022 | Actualizada ás 11:44
Familiares dos falecidos no naufraxio do 'Villa de Pitanxo', no que morreron 21 dos 24 tripulantes, mantiveron este venres un encontro co secretario de Estado para a Axenda 2030, Enrique Santiago, ao que lle trasladaron a "necesidade imperiosa" de baixar ao barco afundido.
A portavoz das familias e filla do xefe de máquinas do buque, María José de Pazo, comunicou que tamén lle reprocharon "a falta de motivación" e "o carpetazo" que consideran lles trasladou o delegado do Goberno en Galicia, José Miñones.
Ademais, de Pazo sinalou que na reunión, na que participou unha representación das 21 familias, tamén lle comentaron ao secretario de Estado que seguen á espera de ser recibidos polo presidente do Goberno, Pedro Sánchez, e a ministra de Traballo, Yolanda Díaz.
Por outra banda, insistíronlle en que España "ten medios" para baixar ao barco, como buques Oceanográficos do Instituto Español de Oceanografía "que van a Terranova desde hai 34 anos". Sobre isto, as familias incidiron en que "priorizan a baixada ao pecio, pero nunca condicionada a recuperar corpos".
Por iso, pedíronlle a Enrique Santiago "todo o apoio" porque consideran que de baixar ao pecio "hai que facelo no verán". Neste sentido, a portavoz das familias asegurou que o secretario de Estado mostroulles "moita comprensión e empatía", así como "respecto pola desgraza".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.