Desconvocada a folga indefinida na limpeza no hospitais Provincial e Montecelo

Os traballadores de Acciona, concesionaria do servizo de limpeza hospitalaria en Pontevedra, desconvocaron a folga indefinida que comezou este luns, 2 de maio, despois de chegar a un acordo de convenio coa empresa que inclúe as "principais reivindicacións do cadro de persoal".

Así o informaron fontes sindicais, que explicaron que entre elas se recolle a elaboración do cuadrante anual para "distribuír mellor os descansos" e "evitar que os empregados teñan que traballar ata 11 días seguidos como na actualidade".

A iso súmase o establecemento dun plus de convenio a cobrar nun único pago no mes de outubro de 150 euros este ano, de 200 en 2023 e de 500 en 2024. Tamén pactaron un plus de absentismo a cobrar tamén nun só pago en outubro, de 50 euros para este ano, de 100 para 2023 e de 200 para 2024, así como outras melloras de carácter social.

O preacordo entre o comité --integrado por CIG, CCOO e UGT-- e a dirección de Acciona foi ratificado en asemblea pola maioría dos traballadores, destacaron os sindicatos. As partes comprometéronse a asinar definitivamente o convenio antes do próximo 15 de maio.

Un traballador da limpeza varre as inmediacións das Urxencias dun hospital galego | Fonte: Carlos Castro - Europa Press - Arquivo

A Consellería de Sanidade publicara este venres no Diario Oficial de Galicia (DOG) a orde pola que se determinan os servizos mínimos durante esta folga con carácter indefinido que afectaba o persoal da empresa que presta servizos de limpeza nos hospitais Provincial e Montecelo.