Rueda non descarta unha investigación para saber se se usou o programa Pegasus para espiar a membros da Xunta

O vicepresidente primeiro en funcións da Xunta, Alfonso Rueda, avoga por esperar a "coñecer os detalles" do uso do programa Pegasus denunciado polo Goberno central contra os teléfonos do seu presidente, Pedro Sánchez, e da ministra de Defensa, Margarita Robles, antes de decidir se se inicia ou non unha investigación interna sobre se hai posibles afectados no Executivo galego.

"Acabamos de coñecer algo que nos contaron desde o Goberno central, que nolo contaron hoxe (este luns) sorpresivamente, e por tanto imos coñecer os detalles antes de dicir nada máis", insistiu.

O vicepresidente confirmou que "aínda" non falou respecto diso co presidente da Xunta, Alberto Núñez Feijóo, quen formalizou o venres a súa renuncia e que este mesmo luns estaba acompañando á presidenta da Comunidade de Madrid, Isabel Díaz Ayuso, nos actos polo 2 de maio.

No entanto, Rueda recoñeceu que pode estar intervido "o teléfono de todo o mundo", en base ao "pouco" que "sorpresivamente" contou o Goberno este luns a través dunha comparecencia da portavoz do Executivo, Isabel Rodríguez, e do ministro de Presidencia, Félix Bolaños.

Feijóo, en calidade de presidente do PP, dixo en Madrid que o feito de que se coñeza agora que os teléfonos de Sánchez e Robles foron infectados polo programa Pegasus é unha "casualidade política non menor" ao producirse en "pleno debate" sobre o caso da presunta espionaxe a dirixentes independentistas e da "estabilidade" do Goberno de coalición de PSOE e Unidas Podemos.