O BNG critica a "falta de transparencia" da Xunta sobre a adquisición do terreo para as dependencias en Ourense
A formación denunciou que a pesar das "reiteradas solicitudes" de acceso ao expediente e a pesar de exceder o prazo establecido para que a Xunta respondese aínda non o fixo.
Por E.P. | SANTIAGO DE COMPOSTELA | 02/05/2022 | Actualizada ás 19:10
O BNG critica a "falta de transparencia" da Xunta de Galicia á hora de facilitar información aos grupos da oposición no Pazo do Hórreo. En concreto o deputado do BNG no Parlamento Iago Tabarés denunciou "dificultades" para obter información sobre a adquisición de catro parcelas, por parte do Executivo galego, en Ourense para a centralización de todas as dependencias administrativas da cidade.
Así o explicou o propio deputado nunha rolda de prensa levada a cabo en Ourense onde estivo acompañado polos concelleiros do partido no Concello, Ruth Reza e Luís Seara. Tabarés manifestou que o BNG é representante público no Parlamento e por tanto "ten a responsabilidade de controlar a acción de goberno da Xunta" pero "non fai máis que negarse a responder".
Neste sentido, referiuse á situación do barrio das Lagoas en Ourense, onde a Xunta de Galicia adquiriu catro parcelas para desenvolver a futura sede administrativa da cidade, centralizando todas as dependencias que actualmente se atopan en distintos puntos.
CRITICA O PROCEDEMENTO
Tabarés matizou que "non cuestiona" a necesidade de que Ourense conte con esta infraestrutura, que lembrou que xa estaba prometida nos tempos de Xosé Cuíña como conselleiro, senón que o BNG critica "o procedemento para adquirilas por un valor de 8,4 millóns de euros". A formación denunciou que a pesar das "reiteradas solicitudes" de acceso ao expediente e a pesar de exceder o prazo establecido para que a Xunta respondese aínda non o fixo.
"NIN PROXECTO, NIN ANTEPROXECTO"
Nesta liña, manifestou que o que sabe a formación é que "non hai nin proxecto nin anteproxecto" e denunciou que a Xunta adquiriu as catro parcelas "por ese prezo sen saber nin como as vai ocupar nin se é o espazo necesario".
Así mesmo, dixo que "tampouco se sabe se se realizou unha tasación das parcelas" para poder verificar "se o prezo pago é o axustado actualmente ao mercado"; expoñendo que, pola información que puideron obter, "aínda que non a través da Xunta", as parcelas están valoradas no proxecto de compensación da zona en 4,9 millóns de euros.
Por todo iso, anunciou que por terceira vez volverá reclamar ao Goberno que remita todo o expediente ao Parlamento para ser examinado polos grupos da oposición.
Pola súa banda, o concelleiro Luís Seara pediu que, aproveitando a futura construción do edificio administrativo no barrio das Lagoas, se retome o proxecto de soterramento da Avenida Otero Pedrayo. Un investimento que considera "necesario para contribuír a deter a greta que existe entre o campus universitario e o resto da cidade".
