As explotacións de leite de vaca máis sustentables son as que teñen maior grao de dixitalización

Unha investigación determinou que as explotacións de vacún de leite máis sustentables son as que presentan un maior grao de dixitalización e contan xa no seu día a día con trámites en liña de procesos burocráticos. O traballo forma parte da tese doutoral de Alba Vázquez Lopez, que presentou a súa investigación na Escola Politécnica Superior de Enxeñería do Campus Terra da USC, que lle outorgou a máxima cualificación.

O pioneiro estudo, segundo destaca a USC, abre un camiño "moi relevante" no ámbito das novas tecnoloxías e o seu traslado ás explotacións agrícolas e gandeiras, no que, como pon de relevo a investigadora, as administracións deben ter un papel protagonista.

Así, incide na "enorme" carga burocrática á que fan fronte os agricultores e gandeiros á hora de tramitar permisos, axudas, nacementos ou saídas de animais.

A tese advirte dos "desequilibrios" acentuados de "forma progresiva" nos últimos anos, atenuados coa incorporación das novas tecnoloxías á cotidianidade das explotacións.

Con todo, apunta que aínda existe "un relevante número de explotacións que non fan uso deste tipo de opcións de comunicación e nin tan sequera o consideran prioritario mentres estean dispoñibles outras alternativas.