O mozo galego ferido gravemente na explosión na Habana "evoluciona favorablemente"
Continúan os trámites para repatriar a súa acompañante, falecida neste suceso.
Por Europa Press / Redacción | Santiago de Compostela | 10/05/2022 | Actualizada ás 19:09
O mozo galego ferido a pasada semana na explosión do Hotel Saratoga, na Habana, "evoluciona favorablemente" das súas feridas, dentro da gravidade, mentres continúan os trámites para repatriar á falecida neste suceso.
Segundo confirmaron fontes gobernamentais, o ferido, natural das Pontes, continúa ingresado no hospital en estado grave, aínda que a súa evolución é "favorable".
Os seus familiares trasladáronse xa a Cuba, onde están en "contacto continuo" coa embaixada, que se puxo á súa disposición para o que necesiten.
Paralelamente, continúan os trámites para repatriar os restos mortais da nova falecida no mesmo suceso, natural de Viveiro. O Goberno e a embaixada traballan coa idea de que poida chegar ao país esta semana, aínda que aínda non concretaron o día.
