Denuncian falta de persoal no Centro de Atención a Persoas con Diversidade Funcional de Ferrol

O presidente do comité de empresa do persoal laboral da Administración Xeral do Estado na provincia da Coruña, José María Pereira, demandou ao Instituto de Maiores e Servizos Sociais (Imserso), dependente do Ministerio de Asuntos Sociais e Axenda 2030, a contratación do persoal suficiente para poder atender os residentes do Centro de Atención a Persoas con Diversidade Funcional de Ferrol (CAMF).

Estas manifestacións realizounas este xoves, 12 de maio, ás portas do citado centro, situado en Catabois, durante unha concentración convocada por este comité e tamén pola Asociación de Persoas Residentes do CAMF de Ferrol (Acafe).

Pereira detallou que a actual situación volveuse "insustentable" e que "a precaria situación do persoal está a afectar os usuarios", ao incidir que "por unha banda existe un elevado número de postos vacantes e por outro levan anos empregando un sistema de contratación temporal declarado irregular pola Inspección de Traballo e que xera unha gran precariedade nas persoas contratadas, que en nada benefician a prestación dun servizo tan especifico como o prestado neste centro".

Pereira denunciou que "nestes últimos anos a situación non deixou de empeorar, a parte dun persoal insuficiente, as vacantes non pararon de aumentar, xa que nestes momentos existen 23 postos vacantes de 157, e ademais non se están cubrindo con contratacións temporais, tampouco as vacacións e permisos aos que ten dereito o persoal", o que motiva "serias dificultades para a atención dás persoas que residen no centro e que non empeora máis grazas ao esforzo que están a realizar as traballadoras a través de incrementos de xornada".

A modalidade de contratación empregada neste centro era a de contratos por circunstancias da produción, pero que "coa entrada en vigor da nova normativa laboral, este tipo de contratos está moi limitado e o Imserso no canto de buscar unha alternativa menos precaria, o que fixo é paralizar case de toda a contratación temporal", detallou o representante dos traballadores.

Noutra orde de asuntos, Pereira tamén aproveitou esta concentración para "denunciar o lamentable estado no que se atopan unhas instalacións que entraron en servizo hai máis de 30 anos e que nunca tivo unha reforma en profundidade".

Así, detallou que "de seis ascensores só" teñen "tres funcionando e os residentes quéixanse no inverno que teñen frío, xa que as xanelas necesitan de maneira urxente un cambio".