Ana Pontón cambiaría "o 100% do goberno" da Xunta actual: "Non hai proxecto"
O BNG aspira "con toda humildade e ambición" a liderar o país, asegura a súa portavoz nacional.
- Bota a andar o "estilo Rueda" co "sentidiño" de Feijóo e defensa de España e do Rei
- Investidura: Rueda ofrece pactos á oposición mentres os trata de "perdedores"
Por Europa Press / Redacción | SANTIAGO DE COMPOSTELA | 13/05/2022 | Actualizada ás 13:45
A portavoz nacional do BNG, Ana Pontón, asegurou este venres que cambiaría "o 100 por cen do goberno" da Xunta actual se dela dependese e insistiu, especialmente, na falta de "proxecto e alternativa". "Estamos a asistir a un cambio de ciclo onde claramente o PP é o pasado e o BNG o futuro", manifestou Pontón a preguntas dos medios nun acto de cultura, no que observou que o de Rueda é "un goberno en que non hai proxecto nin alternativa para o país".
Pontón lembrou que descoñece polo momento a composición dese goberno, pero "en todo caso, o que é relevante para este país, é que necesita ideas que permitan a Galicia saír da situación de declive". A líder nacionalista salientou que Galicia "necesita un programa e un proxecto" para o país, fronte ao PP, que "non ten nin proxecto nin ideas de futuro". Por iso, sinalou que o BNG aspira "con toda humildade e ambición" a liderar o país.
CAMBIAR O CEN POR CEN
Pontón dixo que ela dará "cortesía sempre, 100, 200 ou 300 días", pero contextualizou que o PPdeG leva gobernando xa 13 anos. "Se de min dependese, se os galegos me desen a confianza, cambiaría o 100 por cen", dixo, á pregunta de a que conselleiro ou conselleira cambiaría á fronte da Xunta.
Pontón ironizou con que "sería raro manter algún conselleiro". "Temos un goberno débil, que non está á altura de Galicia. O que fixo o PP é deixar en peores condicións Galicia, aí están os datos: menos poboación, menos xente nova, menos emprego na industria, menos lingua e menos cultura", aseverou Pontón, quen apostou por "unha Galicia que vaia a máis".
A dirixente nacionalista incidiu en que "este é un gran país e pódese construír unha Galicia mellor", polo que se volveu dirixir a quen "queren a este país e levan Galicia na cabeza e corazón", mentres se comprometeu a seguir traballando "desde a oposición" este ano e medio e no futuro, "se os galegos lle dan a súa confianza".
