O sector cultural galego, resentido pola inflación: o prezo dos libros aumenta un 2,5%
O Observatorio da Cultura Galega subliña que baixa o número de fogares que prevén poder asistir a algún espectáculo cultural proximamente.
Por Europa Press / Redacción | SANTIAGO DE COMPOSTELA | 23/05/2022 | Actualizada ás 21:05
O Consello da Cultura Galega alerta de que a recuperación do sector cultural galego vese "condicionada" pola inflación. Destaca que os prezos de libros, prensa e os artigos de papelería son os que máis se resenten ao aumentar un 2,5% debido ao encarecemento da subministración de papel.
O último informe de conxuntura do Observatorio da Cultura Galega, servizo dependente do Consello, apunta que o sector cultural experimentou máis tarde e en menor medida a alza de prezos respecto doutros sectores.
Os servizos recreativos, deportivos e culturais incrementaron os seus prezos entre un 0,8% e un 1,1%. En cambio, o subgrupo que aglutina os equipos audiovisuais, fotográficos e de procesamento de información presentan unha baixada do 2,7%.
No entanto, o Observatorio subliña que a confianza dos consumidores mellorou nos últimos meses, aínda que baixa o número de fogares que prevén poder asistir a algún espectáculo cultural proximamente.
