A Xunta firma un convenio con administradores de leiras para previr a violencia de xénero
Non especifican se hai achega económica no acordo.
Por E.P. | SANTIAGO DE COMPOSTELA | 24/05/2022 | Actualizada ás 13:26
A Consellería de Promoción do Emprego e Igualdade une forzas co Colexio Oficial de Administradores de Leiras (Coafga) e a Asociación Galega de Profesionais dáaAuditoría Sociolaboral de Xénero e da Prevención do Acoso e da Violencia de Xénero nas Organizacións (Agaxen) para a prevención e a detección da violencia de xénero e o acoso sexual na contorna veciñal coa firma de dous convenios de colaboración. Os servizos de prensa da Xunta non especifican se hai achega económica no acordo.
En declaracións aos medios antes da firma destes convenios, a conselleira María Jesús Lorenzana subliñou que con estas novas colaboracións a Xunta busca "reforzar a loita contra situacións de violencia de xénero nas comunidades de propietarios xestionadas por administradores de leiras colexiados" e, por outra banda, "promover a prevención e sensibilización contra o acoso laboral en empresas e organizacións".
Así mesmo, concretou que a administración autonómica e as organizacións farán "un intercambio de coñecementos e de material divulgativo" para que nos seus diferentes ámbitos estendan a mensaxe de que "as vítimas teñan claro que non están soas e que teñen que denunciar os casos de violencia de xénero". Ademais, tamén busca que os familiares e a contorna das persoas que se atopen nunha situación de violencia machista poidan identificar esta realidade e saiban con que recursos contan.
Para isto, a Xunta porá á súa disposición persoal especializado en prevención e loita contra a violencia de xénero para coordinar accións formativas. Lorenzana tamén quixo destacar a necesidade de estreitar lazos con todos os ámbitos da sociedade para avanzar "nunha sociedade máis xusta e igualitaria".
