Persoal de Correos protesta en Santiago contra o recorte de servizos
Denuncian tamén a supresión do rexistro da capital, o último que quedaba en Galicia.
Por E.P. | SANTIAGO DE COMPOSTELA | 24/05/2022 | Actualizada ás 18:31
Delegados da CIG en Correos concentráronse este martes diante do edificio da entidade na rúa do Franco, en Compostela, para denunciar a supresión do rexistro de Santiago, o último que quedaba en Galicia, así como polo "recorte de servizos".
Os delegados lembran que "o rexistro é unha canle de comunicación entre empresa e traballadores", polo que, "agora, para dirixirse ou tramitar de forma oficial calquera solicitude, deberán gastar o diñeiro nun envío por procedemento administrativo", o que "discrimina" o persoal en Galicia.
Xunto a isto, os delegados denunciaron que "o recorte de servizos, debido á falta de contratación", se verá "agravado este verán". Tal e como explica John Vivanco, responsable nacional do sector, "a empresa escúdase na baixada do volume de traballo e tamén na dificultade de realizar contratos coa reforma laboral. Escusas para non cubrir as prazas vacantes, nin contratar por baixas, vacacións ou por calquera outra circunstancia".
O resultado é, segundo Vivanco, que hai "barrios sen repartir e carteiros multiplicándose por varias seccións de repartición coa consecuente diminución na calidade do servizo". Fronte a isto, denuncia que Correos "gasta centos de miles de euros en propaganda duns servizos de banca, pago de tributos ou venda de produtos, entre outros, que logo non se poderán realizar por falta de persoal e nalgúns casos tamén pola falta de produtos nas oficinas".
PRECARIEDADE
Ademais desta situación, os empregados denunciaron outros inconvenientes, como "o precario mantemento na frota de vehículos de correos", así como "o mal funcionamento dos sistemas informáticos nas oficinas e na repartición, que se bloquean acotío xerando colas e queixas nos usuarios".
Xunto a isto, Vivanco cuestiona "o exceso de xefaturas". "Cada vez son máis en comparación ao número de postos base", afirma, e engade que "recentemente nomearon outros mil postos de xefatura, co que xa van preto dos 10.000".
En canto a retribucións económicas, o colectivo de traballadores de Correos tamén sofre "unha considerable perda de poder adquisitivo" que se acumula, neste caso, desde o ano 2011, con conxelacións salariais e subidas por baixo do IPC, denuncian.
