Rueda insiste no seu "estilo propio": "O de solucionar os problemas e non o sucursalismo do PSOE"

O presidente da Xunta, Alfonso Rueda, asegurou que durante a súa etapa á fronte de Goberno galego non optará polos "sucursalismos" como, na súa opinión, fai o PSdeG co Goberno de Sánchez. Ademais, avanzou un "estilo propio": "O estilo de solucionar os problemas".

Así se pronunciou na sesión de control da Cámara galega durante a súa resposta á pregunta formulada polo portavoz parlamentario do PSdeG, Luís Álvarez, quen mostrou a súa preocupación por atoparse ante un "presidente pouco relevante, tutelado, sen política sanitaria, social e económica".

"Nos dez días que levo como presidente vostede ten unha especial preocupación por saber se vou ter un estilo propio á hora de afrontar os problemas", sinalou Rueda, que deixou claro que el terá un "estilo propio" á hora de resolver os problemas dos galegos.

Con todo, destacou que continuará as "cousas boas" emprendidas polo anterior goberno. "Foron moitísimas e das que sinto moi orgulloso, formaba parte dun goberno que estaba a afrontar os problemas", sinalou para asegurar que atenderá todos os "novos retos" collendo "todo o bo".

"Non é ningunha casualidade que fósemos das comunidades que mellor xestionamos a pandemia e que, inmediatamente, tentásemos saír con forza para aproveitar todos os pulos que saían desa recuperación a pesar de que vostedes desde Madrid non o están pondo en absoluto fácil", sostivo.

Ademais, reprochou aos socialistas que lle pidan un "estilo propio" cando o PSdeG trae ao Parlamento unha iniciativa para apoiar "exactamente" as iniciativas do Goberno de Sánchez en relación á guerra de Ucraína "sen posibilidade de facer ningunha matización". "É dicir, que fagamos exactamente o que vostede di que eu non podo facer", censurou. "Sucursalimos non vou facer. Por tanto, á hora de resolver os problemas si que vou ter un estilo propio, non teña ningunha dúbida, o estilo de solucionar os problemas", incidiu.

O PSDEG PÍDELLE QUE "SE POÑA A TRABALLAR"

En fronte, o parlamentario socialista instou ao novo presente da Xunta a "porse a traballar" despois de "tres meses de brazos caídos" desde que a presidenta da Comunidade de Madrid, Isabel Díaz Ayuso, "decidiu que Galicia tiña que cambiar de presidente".

Luís Álvarez asegurou que o proxecto de Rueda "arrinca esgotado, sen ambición de ningún tipo e herda un panorama desolador do que foi corresponsable tras 13 anos" nos que formou parte dos gobernos de Feijóo e mostrouse preocupado por estar ante un presidente "pouco relevante, tutelado, sen política sanitaria, social e económica".

Así as cousas, pediulle que "cambie o rumbo" do seu predecesor e se reúna co secretario xeral do PSdeG, Valentín González Formoso, así como cos concellos. "Aprendeu ben do seu xefe, a botar balóns fóra, a culpar aos demais da nefasta xestión e a vender como éxitos cosas que dependen doutros gobernos", censurou.

Todo iso nunha intervención na que esixiu a Rueda que reverta as listas de espera na sanidade, que aposte por un sistema público de residencias e incorpore aos 10.000 galegos demandantes de Dependencia que "non aparecen nas listas".