Sanidade elaborará ao longo desta lexislatura unha guía para a abordaxe da endometriose
O PSdeG lembrou que as iniciativas aprobadas no 2015 incluían un "plan de atención precoz" do que "non se sabe nada" ou a implantación de equipos multidisciplinares de atención, "que non se constituíron".
Por E.P. | SANTIAGO DE COMPOSTELA | 25/05/2022 | Actualizada ás 20:12
A Consellería de Sanidade elaborará ao longo desta lexislatura unha guía específica coas claves para a abordaxe da endometriose, co obxectivo de mellorar a asistencia a estas pacientes no sistema sanitario público galego.
Así o sinalou o conselleiro de Sanidade, Julio García Comesaña, que compareceu no Pleno do Parlamento para responder unha interpelación en relación a esta doenza e que garantiu o compromiso do persoal facultativo galego e de todo o persoal sanitario con esta asistencia, algo que evidencia, entre outras cuestións, a asistencia a cursos de formación na materia.
Segundo informou García Comesaña, no últimos cinco anos, foron atendidas en Galicia por ingreso hospitalario 1.165 mulleres con endometriosis, cunha idade media de 40,5 anos e con afectación, principalmente, dos ovarios.
O conselleiro respondeu así a unha interpelación formulada pola deputada nacionalista Montse Prado, en relación ao tratamento e atención ás mulleres que padecen endometriose en Galicia, un debate que contou coa presenza na Cámara de membros da asociación querENDO.
Na súa intervención, Prado lembrou que a endometriose é unha patoloxía que afecta a un amplo número de mulleres e que xera dor, perda de calidade de vida, efectos laborais e problemas de infertilidade, entre outras cuestións.
Así, a deputada nacionalista fixo mención na súa exposición dos acordos alcanzados por unanimidade na Cámara galega -o primeiro deles de 2015-- para reclamar á Xunta distintas medidas en beneficio da atención, tratamento e asistencia a estas pacientes, así como orientadas á investigación.
Montse Prado lembrou que estas iniciativas incluían cuestións como un "plan de atención precoz" do que "non se sabe nada" ou a implantación de equipos multidisciplinares de atención, "que non se constituíron". Fronte á "inacción" da Xunta, a deputada asegurou que "o único traballo de visibilización" que se está facendo sobre a enfermidade é o que levan adiante asociacións como querENDO.
