A conselleira do Mar reivindica a pesca tradicional subida nun barco de vapor

A conselleira do Mar, Rosa Quintana, puxo de manifesto este venres a importancia da pesca artesanal e do marisqueo na dinamización económica e laboral das zonas costeiras. Así o destacou durante a 'Xornada sobre pesca costeira e marisqueo artesanal' levada a cabo en Vigo e enmarcada nos actos cos que Galicia se suma este ano ao Día Marítimo Europeo.

Tal como recolle a Xunta nun comunicado, nesta iniciativa analizouse a situación actual e os retos de futuro da pesca costeira artesanal e do marisqueo de Galicia, dous dos sectores fundamentais para a economía galega e a transformación do territorio. A conselleira apuntou que este día serve para que todos os actores implicados expoñan as súas preocupacións e ideas e así deseñar xuntos as novas respostas aos desafíos do futuro.

Por iso, apostou por potenciar os sectores marítimos para garantir a xeración de riqueza económica, a creación de postos de traballo e benestar social, así como o fomento da conservación dos recursos. A xornada levouse a cabo dentro do buque con motor a vapor Hidra Segundo da Fundación Traslatio, sobre o cal Quintana subliñou que se trata dun "espazo privilexiado", que permanece atracado no Berbés e ofrece visitas abertas ao público para ensinar o seu funcionamento e historia, ao tratarse do único barco con motor de vapor en activo de todo o Estado.

A conselleira do Mar, Rosa Quintana, durante o pleno do Parlamento galego. XUNTA DE GALICIA