Por E.P. | SANTIAGO DE COMPOSTELA | 27/05/2022 | Actualizada ás 18:38
Galicia recibirá 10,7 millóns de euros para accións de modernización da administración de xustiza que proceden do Mecanismo de Recuperación e Resiliencia dos fondos europeos Next Generation. O Goberno central aprobou este venres a repartición destas partidas durante a conferencia sectorial de xustiza, onde o Executivo galego estivo representado pola secretaria técnica da Vicepresidencia Segunda, Elena Muñoz.
Segundo trasladou a Xunta ao termo da reunión, o Ministerio de Xustiza comprometeuse a liberar no próximo mes de xuño os fondos, que se asignarán para este exercicio de 2022 e o de 2023. Deste xeito, a Administración autonómica terá ata finais de 2023 de prazo para comprometer os proxectos e proceder á súa execución antes de finais de novembro de 2025.
Das partidas consignadas a Galicia, case a metade (4,6 millóns) irán parar a financiar a aplicación do 'Proxecto Cero', orientado a mellorar a interoperabilidade dos elementos dixitais comúns. Ademais, tamén se impulsará o 'Proxecto 6' de inmediación dixital, para o que se investirán máis de 1,2 millóns de euros co obxectivo de levar a cabo iniciativas autonómicas.
No caso de Galicia están previstos avances na gravación de actos procesuais, servizos dixitais para a atención á cidadanía e automatización das solucións dixitais prestadas pola Administración de Xustiza.
Por outra banda, destinaranse 3,4 millóns para a posta en marcha de sistemas de xestión procesual interoperables no ámbito xudicial e haberá fondos para a creación dun espazo para xerar e intercambiar información e datos.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.