Pontón pide un "cordón sanitario" ao negacionismo e máis orzamento contra a violencia machista

A portavoz nacional do BNG, Ana Pontón, reclamou establecer un "cordón sanitario" contra o discurso "negacionista" da violencia de xénero "dunha parte da dereita", porque, advertiu, o "machismo mata", á vez que reclamou máis recursos. Ante o caso de violencia que mantén unha muller en Carballo debaténdose entre a vida e a morte, Pontón remarcou que a formación nacionalista fará 'causus belli' para que se destine o 1 por cento dos orzamentos da Xunta á loita contra a violencia de xénero.

Ademais, levará ao Parlamento para buscar a posición unánime das tres formacións políticas a petición de crear tres xulgados específicos de loita contra a violencia de xénero --en Santiago, Lugo e Ourense--. Esta cuestión abordouse na reunión da comisión de seguimento do pacto de investidura entre o BNG e o Goberno que preside Pedro Sánchez.

Pontón quixo este martes, durante unha visita a Allariz, pór o "foco" nunha cuestión que "debería preocupar a toda a sociedade". "É necesario activar políticas para loitar contra a violencia machista e darlle un impulso desde as institucións", manifestou a dirixente nacionalista, quen sinalou que "non se pode aceptar como normal ou como aceptable a violencia machista".

A portavoz nacional do BNG apuntou que "o que se necesitan son máis medios para axudar ás mulleres que están nesa situación" e hai que "ir máis aló". Así, advertiu de que o "discurso negacionista" o que provoca é "deixar en maior indefensión" ás mulleres que sofren violencia machista, para o que propón "un cordón sanitario, porque é un tema vital".

"DEBEMOS ACTUAR"

"A violencia machista atenta contra o dereito das mulleres a vivir sen medo e sen violencia e aí debemos actuar", manifestou Pontón, quen explicou que aumentar o orzamento ao 1 por cento ten como obxectivos, entre outros, "traballar en prevención" e "fortalecer" a educación e máis medios para axudar ás mulleres nesta situación.

En canto aos xulgados, defendeu que "son importantes" para que os procesos "sexan rápidos" e as mulleres "se animen a denunciar". "Para que eses xulgados sexan unha realidade, ten que ser unha petición unánime e por iso levaremos ao Parlamento esta petición e esperamos que as forzas galegas vaiamos da man para solicitar a creación destes xulgados e sexan unha realidade", apostilou.

A portavoz nacional do BNG, Ana Pontón, en Lalín (Pontevedra). BNG | Fonte: Europa Press