Prisión para catro gardas civís por proferir insultos homófobos a un compañeiro en Noia
"Os maricóns non deberían de estar na Garda Civil", "Arriba España e morte aos maricóns" ou "prefiro ter un fillo morto ou drogadicto que maricón" foron algunhas das humillacións cara a vítima, que se atopa en tratamento psicolóxico.
Por Europa Press / Redacción | SANTIAGO DE COMPOSTELA | 31/05/2022 | Actualizada ás 17:15
O Tribunal Supremo confirmou unha pena de 10 meses de prisión para catro gardas civís --un deles, co cargo de cabo primeiro-- que durante anos proferiron comentarios, humillacións e insultos homófobos a un compañeiro do cuartel de Noia.
O alto tribunal publicou o luns 30 de maio este fallo que desestima os recursos dos acusados e confirma unha sentenza previa do Tribunal Militar Territorial Cuarto, con sede na Coruña, que os condenou como autores dun delito consumado de abuso de autoridade, en modalidade de acoso profesional e atentado contra a dignidade persoal do traballo, así como por discriminación por orientación sexual.
Así, á parte da pena de 10 meses de cárcere, que inclúe unha atenuación por dilacións indebidas no proceso, o Supremo ratificou a multa de 10.000 euros que deben abonar á vítima en concepto de danos psíquicos e morais. Ademais, o TS emenda a sentenza recorrida para engadir a responsabilidade civil subsidiaria do Estado no pago desta indemnización.
Os feitos probados da sentenza confirmada recollen que, entre 2010, cando a vítima chegou ao cuartel de Noia, e 2014, un cabo primeiro da Garda Civil e outros tres axentes máis veteranos que el, referíanse a el con expresións como "maricón", "maripili", "fresita" e "a muller do posto".
En concreto, o cabo primeiro proferiu comentarios como que "os maricóns non deberían de estar na Garda Civil". "Arriba España e morte aos maricóns" e "prefiro ter un fillo morto ou drogadicto que maricón" foron outras das expresións empregadas por este superior, segundo relata o fallo.
Todas estas descualificacións alternábanse, en ocasións, con bromas ou mofas, así como con comentarios sobre a súa competencia profesional tales como "inútil" ou "vago", engade a sentenza. Toda esta situación comezou desde o momento en que o home se incorporou ao posto de Noia, en xuño de 2010, e mantivéronse de forma ininterrompida ata que o 30 de novembro de 2014 tivo que ser atendido por unha crise de ansiedade.
Desde esa data, a vítima permanece de baixa para o servizo por razóns médicas, e recibe atención psicolóxica e psiquiátrica, xa que presenta un cadro crónico e complexo de longa duración, diagnosticado como un trastorno mental severo.
OS ACUSADOS ALEGARON QUE NON HABÍA PROBAS SUFICIENTES
Os acusados, entre outros argumentos, recorreron a sentenza do tribunal A Coruña ante o Supremo alegando vulneración do dereito á presunción de inocencia, por estimar que, ao seu xuízo, non había probas suficientes. Con todo, o TS desestimounos ao destacar que o Tribunal Militar Territorial Cuarto realizou unha valoración "razoable" das probas, tanto da declaración da vítima como das testemuñas que corroboraron a súa versión.
De feito, os maxistrados insisten en que non houbo contradicións, nin modificacións nin ambigüidades nas diferentes declaracións, senón que son "firmes, persistentes e contundentes".
