Educación avanza aos centros galegos as instrucións do próximo curso para "facilitar a organización"
As escolas de idiomas adiantan aos meses de xuño e xullo o seu período de matrícula, que ata agora era en setembro.
Por E.P. | Santiago de Compostela | 31/05/2022 | Actualizada ás 19:36
A Consellería de Cultura, Educación, FP e Universidades trasladou aos centros educativos as instrucións do final deste curso e inicio do próximo 2022/23, co obxectivo de "facilitar ao máximo a organización e planificación lectiva" por parte das direccións, xa que os currículos definitivos aínda non están publicados.
Segundo informa a Xunta, trátase de dar "seguridade xurídica" aos colexios e institutos e "certezas ás familias" dos estudantes, posto que no próximo ano académico estarán en vigor de maneira simultánea dúas leis educativas: a nova Lomloe para os cursos impares e a Lomce para os pares.
Neste contexto, o profesorado --a través da plataforma informática interna creada para tal fin-- xa ten acceso ao currículo para a elaboración das programacións didácticas dos cursos impares antes de que se aproben os currículos.
Precisamente, a pasada semana a Xunta abordou cos sindicatos --CIG, ANPE, UGT e CC.OO.-- en mesa sectorial os borradores dos decretos que fixan os currículos de Educación Secundaria Obrigatoria (ESO) e Bacharelato para o curso 2022/23 en Galicia, que aínda deben ser aprobados e publicados.
Ante este panorama, a Consellería lamenta "o atraso" do Goberno central na publicación pola súa parte dos currículums, o que leva a que "non estean publicados os textos definitivos" antes do arrranque das clases.
SISTEMA CENTRALIZADO DE FP BÁSICA
Entre as novidades que inclúe a planificación, está a redistribución das datas de probas e períodos de matrícula tras a eliminación das probas extraordinarias de setembro coa nova lei educativa.
No que respecta a Formación Profesional (FP), os graos básicos terán un sistema centralizado de matrícula que, segundo destaca a Consellería, "favorece as familias e o alumnado" que opta por esta modalidade.
Así, en caso dos estudantes que finalicen a ESO e queiran optar a FP básica, serán os propios centros de orixe os encargados de tramitar a documentación e as solicitudes de praza no ciclo que queiran.
ADIANTO DA MATRÍCULA NA EOI
Do mesmo xeito, para a Escola Oficial de Idiomas (EOI), a Xunta decidiu adiantar aos meses de xullo e xullo o proceso de matrícula, que ata agora se desenvolvía en setembro.
A preinscrición nestes centros para os alumnos que entren por primeira vez será entre o 27 e o 10 de xuño. No que se refire ao período de matrícula, os estudantes que aproben en convocatoria común deberán formalizala entre o 20 e o 30 de xuño, os que o fagan na extraordinaria, do 1 a 7 de xullo, e para o resto --incluídos os que entran por primeira vez, tras a preinscrición-- será do 1 a 20 de xullo .
Ademais, as probas extraordinarias de setembro pasan a xuño e, neste curso, celebraranse a partir do 20.
CALENDARIO ESCOLAR, O XOVES NO DOG
Por outra banda, a Consellería de Educación informa de que este xoves o Diario Oficial de Galicia (DOG) publicará o calendario escolar para o curso 2022-23, que non contén novidades respecto da proposta elevada á mesa sectorial docente a pesar das críticas dos sindicatos, que pedían atrasar o arranque.
Así pois, o curso comezará o 8 de setembro para todas as etapas educativas, incluídas as de Secundaria, Bacharelato e Ensinos de Réxime Especial.
