Por A.C. Pereira-Menaut | Santiago de Compostela | 02/06/2022 | Actualizada ás 18:40
A portavoz do BNG en Europa, Ana Miranda, avisa de que seguirá "presionando" en Bruxelas para que a Comisión de Investigación de Accidentes Ferroviarios (CIAF) realice unha investigación independente do accidente do Alvia en Angrois, no que faleceron 80 persoas en 2013.
O BNG valora que o Tribunal Superior de Xustiza de Madrid estimase parcialmente o recurso contencioso administrativo presentado pola Plataforma de Vítimas Alvia 04155 e ordenase á CIAF que se reúna para analizar e dar resposta á solicitude dunha nova investigación sobre o sinistro.
O Bloque remarca que xa trasladou no seu día "as manipulacións realizadas polo Ministerio de Fomento en 2016 respecto da presión exercida no Executivo comunitario para que non se soubese o contido do informe da Axencia de Seguridade Ferroviaria Europea sobre as causas do accidente de Angrois". "Mediante esas manipulacións, a CIAF culpaba exclusivamente o maquinista e trataba de que a UE non revelase as súas críticas á investigación oficial realizada pola CIAF", agrega.
A portavoz do BNG en Europa incide en que o informe cuestionaba a independencia da CIAF e puña de manifesto que as vítimas non foran escoitadas nin tidas en conta durante o proceso.
Miranda lembra que, desde 2019, a Comisión Europea ten aberto un procedemento de infracción contra o Estado por incumprir a normativa europea de seguridade ferroviaria.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.