Por E.P. | SANTIAGO DE COMPOSTELA | 07/06/2022 | Actualizada ás 19:21
O Diario Oficial de Galicia (DOG) publica o decreto polo que se regulan as condicións e os requisitos para a preparación e entrega de sistemas personalizados de dosificación nas oficinas de farmacia da Comunidade. Entrará en vigor aos 20 días da súa publicación.
Para poder fornecer estes dosificadores personalizados aos pacientes --o Goberno autonómico xa avanzara que se daría este paso--, os titulares ou rexentes das farmacias que desexen prestar o servizo deberán presentar, de forma previa ao comezo da actividade, unha declaración responsable asinada.
Entre outras cuestións, o decreto estipula que os farmacéuticos que queiran prestar este servizo, deberán recibir formación específica sobre sistemas personalizados de dosificación, do mesmo xeito que o persoal técnico que interveña no proceso.
A preparación dos medicamentos nestes sistemas de dosificación deberá realizarse dentro das instalacións da oficina de farmacia na que fosen dispensados os envases.
E no local autorizado da oficina habilitarase unha área dedicada a esta actividade. A zona estará identificada e diferenciada da de almacenamento doutros medicamentos e produtos para evitar confusións.
DISPOSITIVOS HOMOLOGADOS E CON COMPARTIMENTOS
Estes dispositivos de dosificación personalizada, que contarán cunha serie de compartimentos onde se distribúe a medicación que ha de tomar un paciente durante un período determinado de acordo coa pauta prescrita.
O decreto sostén que os dispositivos deberán estar homologados e certificados polo fabricante para realizar o acondicionamento de medicamentos, de acordo coas guías farmacéuticas de referencia internacional na materia. Os que teñan sistema de selado serán desechables.
AVALIACIÓN DE IDONEIDADE E CONSENTIMENTO
Antes do inicio do servizo de preparación e entrega deste sistema, o farmacéutico manterá unha entrevista inicial coa paciente, o seu representante legal ou persoa autorizada para informar o servizo de preparación e entrega. Asegurarase de que o paciente comprendeu a información para a obtención da súa autorización.
Tamén deberá facerse unha avaliación documentada sobre a idoneidade individual e a súa inclusión deberá quedar xustificada con base no risco beneficio do mesmo. As vantaxes de maior adherencia deberán superar os inconvenientes de menor participación dos propios pacientes no control da súa medicación.
Os pacientes, os seus representantes legais ou persoas autorizadas deberán prestar por escrito o consentimento para que as farmacias poidan prestarlles o servizo de elaboración e entrega de SPD.
Así mesmo, rexistraranse os datos persoais dos pacientes e revisarase toda a súa medicación, e os seus problemas de saúde, así como a documentación médica relevante da que se dispoña. Toda a información quedará rexistrada na ficha do paciente, que servirá como ficha de traballo para efectuar o control farmacoterapéutico.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.